ရွှေဝါရောင်ဦးဆောင်ပါဝင်ခဲ့သူရဟန်းတော်များအခက်အခဲရင်ဆိုင်နေရ

ရခိုင်ပြည်နယ်မှ မြို့ကြီးတချိ့မှ ဘုန်းတော်ကြီး စာသင်တိုက်များတွင် ရွှေဝါရောင်တော်လှန် ရေး၌ ဦးဆောင်ပါဝင်ခဲ့သော ရဟန်းတော်များကို ကျောင်းဝင်ခွင့် မပြုသဖြင့် တချို့ ရွှေဝါရောင် တော်လှန်ရေးကို ဦးဆောင်ပါဝင်ခဲ့သူ ရဟန်းတော်များမှာ စာသင်ရန်အခက်အခဲ ကျရောက် ဖြစ်ပေါ် နေကြရသည်။

အမည် မဖေါ်လိုသူ ရဟန်းတော်တပါးက“ဦးဇင်းတို့ရဲ့ ဓါတ်ပုံတွေကို စစ်အာဏာပိုင်တွေက ဘုန်းတော်ကြီး ကျောင်းတိုက်တွေကိုပေးထားပြီး ဆရာတော်ကြီးတွေကို ၀ါဆိုစာသင်သား ရဟန်းတော်တွေကို လက်ခံတဲ့အခါ ဦးဇင်းတို့လို ဦးဆောင်ပါဝင်ခဲ့တဲ့ ရဟန်းတော်တွေကို လက်မခံဖို့ လျှောက်ထားတဲ့အတွက် အခုကျောင်းတိုက်တွေက ဦးဇင်းတို့ကို လက်ခံဖို့ ငြင်းဆိုနေကြတယ် တကာကြီး။” ဟု ပြောသည်။

ယခုအခါ ရခိုင်ပြည်နယ်အတွင်းရှိ ဘုန်းတော်ကြီး ကျောင်းများတွင် ၀ါဆိုရန်အချိန်နီးကပ် လာသဖြင့် စာသင်သား ရဟန်းတော်များကို ယခင်နှစ်များကကဲ့သို့ လက်ခံနေ သည်။

“အခု စာသင်တိုက်တွေမှာ စာသင်ခွင့်မရဘဲ အခက်အခဲ ကြုံတွေ့နေရတဲ့ ရဟန်းတော်က ရာချီပြီး ရှိမယ်ထင်ပါတယ်။ ခုလို ဖြစ်နေတာက စစ်တွေတမြို့တည်းမှာ မဟုတ်ပါဘူး။ မြောက်ဦး၊ မင်းပြားနဲ့ကျောက်ဖြူမြို့တွေမှာလည်း ခုလိုငြင်းပယ်နေတယ်လို့ သိရှိရပါတယ်။ တချို့ကျောင်းတိုက်တွေမှာဆိုရင် ဆန္ဒပြပွဲ ပေါ်ပေါက်ခဲ့ရင် မပါဝင်ပါဘူးဆိုပီး ကျောင်းဝင် ရဟန်းတော်တွေကို ကျောင်းထိုင် ဆရာတော်တွေက လက်မှတ်အတင် ထိုးခိုင်း နေတယ်လို့ သတင်းတွေ ရရှိပါတယ်။”ဟု အဆိုပါဦးဇင်းက ပြောသည်။

ယခုနှစ်တွင် ယခင်နှစ်များကကဲ့သို့ ရဟန်းတော်များ လမ်းပေါ်ထွက် ဆန္ဒပြမည်ကို အာဏာ ပိုင်များက စိုးရိမ်နေသဖြင့် ကျောင်းထိုင်ဆရာတော်များကတဆင့် စာသင်သား ရဟန်းတော် များကို ဆန္ဒပြရာတွင် မပါဝင်ရန် ဖိအားပေး အကျပ်ကိုင်နေခြင်း ဖြစ်ကြောင်း ပြည်တွင်းမှလာ သော သတင်းများတွင် ဖေါ်ပြသည်။

“ဆရာတော်ကြီးတွေက အာဏာပိုင်တွေဆီက ဆန်အိတ်တပိုင်းတစနဲ့ အခွင့်အရေးတချို့ကို မျှော်ကိုးပြီး ဦးဇင်းတို့ကို လက်မခံရင်လည်း မတတ်နိုင်ပါဘူး။ ဘယ်ကျောင်းတိုက်မှ ဦးဇင်းတို့ကို လက်မခံဘူးဆိုရင် နောက်ဆုံး ဦးဇင်းတို့အနေနဲ့ လူထွက်ရုံဘဲ ရှိပါတယ်။”ဟု အဆိုပါ ဦးဇင်းက နိဂုံးချုပ် နိရဉ္စရာသို့ ပြောကြားသည်။
Narinjara.