မြန်မာ့ဒီမိုကရေစီရေးတိုက်ပွဲကို အားပေးထောက်ခံကြ

ဒုတိယကမ္ဘာစစ်ကြီးရဲ့ ကြောက်မက်ဖွယ် အဖြစ်ဆိုးတွေက အကြမ်းဖက်မှုနဲ့ စစ်ဆိုရင် ဘယ်သောအခါမှ လက်သင့်မခံချင်တော့ လောက်အောင် လူ့အဖွဲ့အစည်းကြီးကို တုန်လှုပ်ချောက်ချားသွားစေခဲ့ပြီး ငြိမ်းချမ်းတဲ့ ခေတ်သစ်တခုကို အစပျိုးပေးခဲ့တယ်။ ဒါပေမယ့် နှိပ်စက်ညှဉ်းပန်းမှုနဲ့ ရာဇဝတ်မှုတွေကို ကျနော်တို့ အခုအချိန်အထိ အတောမသတ် မြင်တွေ့နေရဆဲပါ။ အချို့ဖြစ်ရပ်တွေမှာဆို လူမျိုးတုံးသတ်ဖြတ်မှု အဆင့်ထိတောင် ဖြစ်ခဲ့ကြတာပါ။ ဒီလိုဖြစ်ရတာဟာလည်း ဒီရာဇဝတ်မှုတွေကို ကာကွယ်ဟန့်တားနိုင်စွမ်းရှိသူတွေက အနည်းအကျဉ်းလောက်သာ စွမ်းဆောင် ပေးနိုင်ခဲ့တာကြောင့် ဒါမှမဟုတ် ဘာတခုမှကို စွမ်းဆောင်မပေးခဲ့တာကြောင့်ပါ။

၁၉၇ဝ ပြည့်လွန်နှစ်တွေတုန်းက ကမ္ဘောဒီးယားမှာ “killing fields” လို့ခေါ်တဲ့ အစုအပြုံလိုက် သတ်ဖြတ်မှုတွေ ဖြစ်ခဲ့တယ်။ ၉၄ ခုနှစ်က ရဝမ်ဒါမှာ လူမျိုးတုံးသတ်ဖြတ်မှုတွေ ဖြစ်ခဲ့တယ်။ ဒါဖာ (ဆူဒန်)၊ ဆိုမားလီးယားနဲ့ ကွန်ဂိုသမ္မတနိုင်ငံတွေမှာဆိုရင် အခုထိ ရက်စက်ကြမ်းကြုတ်မှုတွေ ပေါ်ပေါက်နေဆဲပဲ။ ဘုရားသခင်က လူသားတွေကို အသိဉာဏ်ပညာရှိသူတွေ၊ သနားညှာတာထောက်ထားတတ်သူတွေအဖြစ် ဖန်တီးပေးသနားခဲ့ပါလျက် တဦးအပေါ်တဦး လူမဆန်တဲ့ အရက်စက် အကြမ်းကြုတ်ဆုံး အပြုအမူတွေ ပြုမူနေကြဆဲပဲဆိုတာ ဒီနမူနာဖြစ်ရပ်တချို့က ကျနော်တို့ကို သတိပေးနေသလိုပါပဲ။

အကြမ်းဖက်မှုနဲ့ အာဏာရှင်စနစ်ကို ဆန့်ကျင်သူတွေ ထကြွပုန်ကန်ရတော့မယ့်အချိန် ကျရောက်နေပါပြီ။ သမိုင်းတလျှောက်မှာ အာဖရိက၊ အာရှနဲ့ ဥရောပတလွှားက ပြည်သူသန်းပေါင်းများစွာဟာ အာဏာရှင်တွေကို ဆန့်ကျင်အုံကြွ တွန်းလှန်ဖယ်ရှားပြီး လွတ်လပ်မှုနဲ့ ဒီမိုကရေစီလမ်းကြောင်းကို လျှောက်လှမ်းခဲ့ကြပါပြီ။

ပြီးခဲ့တဲ့ သြဂုတ်လ (၅) ရက်နေ့မှာ ကျနော် မနီလာကို ရောက်ခဲ့တယ်။ အာရှတိုက်ရဲ့ သူရဲကောင်းတဦးဖြစ်တဲ့ ကိုရာဇွန်အကွီနိုကို ဂါရဝပြုဖို့ သွားရောက်ခဲ့တာပါ။ သူမဟာ ၁၉၈၆ ခုနှစ်တုန်းက အာဏာရှင်မားကို့(စ်)ကို တွန်းလှန်ဖယ်ရှားနိုင်ခဲ့တဲ့ “ပြည်သူ့အာဏာလှုပ်ရှားမှု” ကို ဦးဆောင်ခဲ့သူပါ။ ရိုးသားနှိမ့်ချတဲ့ သာမန်အိမ်ရှင်မဘဝကနေ နိုင်ငံတကာက အသိအမှတ်ပြု လေးစားခဲ့ရတဲ့ နိုင်ငံရေးသမားတယောက်လည်းဖြစ်၊ သူရဲကောင်းလည်းဖြစ်ခဲ့ရတဲ့ သူမကို ဖိလပ်ပိုင်ပြည်သူ သန်းပေါင်းများစွာတို့က နှုတ်ဆက်ဂါရဝပြုခဲ့ကြပါတယ်။

၁၉၉၈ ခုနှစ်မှာ အင်ဒိုနီးရှားကျောင်းသားတွေ ဦးဆောင်တဲ့ လှုပ်ရှားမှုတခုကြောင့် အာဏာရှင်ဆူဟာတို ပြုတ်ကျခဲ့ရတယ်။ ဒီဖြစ်ထွန်းမှုက ကျနော်တို့ တိုင်းပြည်လွတ်မြောက်ရေးကိုလည်း အထောက်အကူဖြစ်စေခဲ့တယ်။ ကနေ့ကာလမှာ အင်ဒိုနီးရှားနဲ့ ဖိလစ်ပိုင်တို့ဟာ ဒေသတွင်းမှာ ဒီမိုကရေစီနဲ့ သည်းခံစိတ်ရှည်မှုတွေရဲ့ စံနမူနာကောင်းတွေပါပဲ။ ဒါပေမယ့် ဒါဟာလည်း ပြည့်စုံကုံလုံမှုတော့ မရှိသေးပါဘူး။ ကျနော်တို့ တီမောလိ(စ်)မှာ ဖြစ်ပျက်ကြုံတွေ့နေရသလိုမျိုးပေါ့။

အင်အားကြီးနိုင်ငံတချို့မှာလည်း ပြည်သူတွေရဲ့ဆန္ဒကို လိုက်လျောခဲ့ရတာ၊ နိုင်ငံတကာရဲ့ဖိအားကို မလွန်ဆန်နိုင်ခဲ့တာတွေ ရှိခဲ့တာပဲ။ ဆိုဗီယက်ပြည်ထောင်စုဟောင်းနဲ့ အသားအရောင်ခွဲခြားတဲ့ တောင်အာဖရိကအစိုးရရဲ့ အဖြစ်အပျက်တွေဟာ နမူနာဖြစ်ရပ်အချို့ပါပဲ။

လွန်ခဲ့တဲ့နှစ် (၅ဝ) လောက်ကတည်းက ပြောင်းလဲသွားခဲ့ပြီဖြစ်တဲ့ ကမ္ဘာကြီးမှာ ရှက်ရွံ့စရာ၊ စိတ်ကသိကအောက်ဖြစ်စရာ ပြယုဂ်တခုအနေနဲ့ အနည်းအကျဉ်းလောက်သာ ကျန်ရစ်နေတဲ့ အာဏာရှင်နိုင်ငံတွေထဲမှာ မြန်မာနဲ့ မြောက်ကိုရီးယားဟာ အထင်အရှားဆုံးပါပဲ။ အရှေ့ဥရောပ၊ အာဖရိက၊ အာရှနဲ့ လက်တင်အမေရိကတလွှားမှာ အရည်အချင်း မပြည့်ဝမှု၊ မောက်မာမှုတွေနဲ့ အနိုင်ကျင့်စိုးမိုးအုပ်ချုပ်ခဲ့တဲ့ အာဏာရှင်တွေထဲက အများစုကို အပြောင်းအလဲဆိုတဲ့ လေထုတွေက တိုက်ဖျက်ဖြိုလှဲခဲ့ကြပြီးပါပြီ။

အခုအချိန်ဟာ မြန်မာ့ဒီမိုကရေစီရေးအတွက် ပိုမိုအားစိုက်လုပ်ဆောင်ဖို့၊ ပိုမိုဆန်းသစ်တီထွင်တဲ့ နည်းလမ်းတွေသုံးပြီး တိုက်ပွဲဝင်ကြဖို့ အချိန်ကျရောက်နေပါပြီ။

ဖွံ့ဖြိုးဆဲနိုင်ငံတွေအပေါ် ကုန်သွယ်ရေးနဲ့ စီးပွားရေးဒဏ်ခတ် ပိတ်ဆို့အရေးယူမှုတွေကို ကျနော်မလိုလားပါဘူး။ ဘာကြောင့်လဲဆိုတော့ အဲဒီလိုဒဏ်ခတ်အရေးယူမှုဟာ နိုင်ငံရေးအရ မှန်တယ်လို့ ပြောနိုင်သလို ကျနော်တို့အတွက်လည်း ဘဝင်ကျစရာဖြစ်ပေမယ့် အကြီးအကျယ် ဆင်းရဲဒုက္ခရောက်နေတဲ့ ပြည်သူတွေအတွက်တော့ ဘူးလေရာ ဖရုံဆင့်ဆိုသလို ဖြစ်နိုင်လို့ပါပဲ။

ဒါပေမယ့် ဒေသတွင်းမှာရှိနေတဲ့ စစ်အစိုးရနဲ့ သူ့အပေါင်းအဖော်တွေ ပိုင်ဆိုင်တဲ့ ဓနဥစ္စာတွေအပေါ် ထိန်းချုပ်ကန့်သတ်တာ မျိုးကိုတော့ ကျနော် မဆန့်ကျင်ပါဘူး။ နိုင်ငံတကာအသိုင်းအဝိုင်းအနေနဲ့ အစွန်းရောက် အကြမ်းဖက်အုပ်စုတွေနဲ့ ပတ်သက်ဆက်နွှယ်သူတွေ ပိုင်ဆိုင်တဲ့ ငွေကြေးဓနဥစ္စာတွေအပေါ် ထိန်းချုပ် ကန့်သတ်မှုတွေ လုပ်နိုင်တယ်ဆိုရင် အခုတတိုင်းပြည်လုံးကို ပြန်ပေးဆွဲသိမ်းပိုက်ထားပြီး အပြစ်မဲ့ပြည်သူတွေကို အစုအပြုံလိုက် သတ်ဖြတ် မုဒိမ်းကျင့်နေသူ တွေကိုလည်းပဲ ဦးတည်ချက်ထားပြီး အရေးယူဆောင်ရွက်ရေးဟာ ကိုယ်ကျင့်သိက္ခာပိုင်းအရရော၊ နိုင်ငံရေးအရပါ ထပ်တူထပ်မျှ လိုအပ်တယ်ဆိုတာကို နားလည်ခံယူထားရမှာဖြစ်ပါတယ်။

မြန်မာစစ်အစိုးရနဲ့ ပတ်သက်ဆက်နွှယ်သူတွေရဲ့ နိုင်ငံရပ်ခြားဘဏ်တွေမှာ အပ်နှံထားရှိတဲ့ ငွေကြေးဥစ္စာတွေကို ထိန်းချုပ်ကန့်သတ်ဖို့ မဖြစ်မနေ လိုက်နာဆောင်ရွက်ရမယ့် ဆုံးဖြတ်ချက်မျိုးကို ကုလသမဂ္ဂလုံခြုံရေးကောင်စီက ချမှတ်ဖို့ သေချာပေါက် မဖြစ်နိုင်တော့ဘူးဆိုရင် အမေရိကန်၊ ဥရောပ၊ ဂျပန်နဲ့ အခြားသဘောထားကိုက်ညီတဲ့ နိုင်ငံတွေအနေနဲ့ အဲဒီလိုအရေးယူဆောင်ရွက်မှုမျိုးကို ကိုယ့်အစီအစဉ်နဲ့ကိုယ် ဆောင်ရွက်ဖို့လိုပါတယ်။

အင်တာပိုလို ရဲတပ်ဖွဲ့ဝင်တွေကိုလည်း စစ်အုပ်စုနဲ့ သူအပေါင်းအဖော်တွေက သူတို့ငွေကြေးဥစ္စာတွေကို ကမ္ဘာ့ဘယ်အရပ်၊ ဘယ်ဒေသမှာ ဘယ်လို ဘယ်လောက် မြှုပ်နှံထားရှိတယ်ဆိုတာကို လက်ခံထားရှိတဲ့ ဘဏ်အမည်စာရင်းတွေနဲ့တကွ စုံစမ်းဖော်ထုတ်ပေးဖို့ ညွှန်ကြားထားရပါမယ်။ အကြမ်းဖက်အုပ်စုတွေကို ငွေကြေးခန်းခြောက်အောင် လုပ်တာမျိုး၊ ကြားကနေ ဖြတ်တောက်သိမ်းယူတာမျိုး စတဲ့နည်းလမ်းတွေသုံးပြီး မြန်မာစစ်အစိုးရကို အကြပ်ဆိုက်အောင်လုပ်ဖို့လိုပါတယ်။ ဒါ့အပြင် သူတို့ရဲ့စည်းစိမ်ဥစ္စာတွေကို အကာအကွယ်ပေးနေတဲ့ ဘယ်ငွေကြေးအဖွဲ့အစည်းကိုမဆို အရေးယူအပြစ်ပေးဖို့လည်း လိုပါတယ်။

အိုဘားမားအစိုးရအနေနဲ့ ကမ္ဘာကြီးအတွက် သစ်လွင်လတ်ဆတ်တဲ့ အနေအထားသစ်နဲ့ မျှော်လင့်ချက်သစ်တွေ ပေးစွမ်းဖို့ ကြိုးပမ်းနေတယ်။ ဒါ့အပြင် ကြောက်ရွံ့မှု၊ မောက်မာမှု၊ အရည်အချင်းမပြည့်ဝမှုတွေနဲ့ ကိုယ့်တွင်းကိုယ်တူးပြီး နစ်နေတဲ့ မြန်မာစစ်အစိုးရလို အစိုးရမျိုးတွေကို သိက္ခာရှိရှိ ပြန်ရုန်းထွက်လာနိုင်ပြီး ငြိမ်းချမ်းရေးသံလွင်ခက်ကို လှမ်းယူဆုပ်ကိုင်နိုင်ဖို့ အတွက် တွေ့ဆုံဆွေးနွေးရေး အခွင့်အလမ်းကို ကမ်းလှမ်းဖွင့်လှစ်ပေးခဲ့တယ်။ ဒါပေမယ့် စည်ပင်သာယာဝပြောခဲ့တဲ့ နိုင်ငံတနိုင်ငံကို အလွဲလွဲအမှားမှား စီမံခန့်ခွဲအုပ်ချုပ်ရင်း ဖျက်ဆီးခြေမွှခဲ့တဲ့ မြန်မာစစ်အာဏာပိုင်တွေကတော့ အိုဘားမားအစိုးရရဲ့ အကောင်းမြင်ဝါဒနဲ့ သင့်မြတ်ပြေလည်ရေးနည်းလမ်းကို အသုံးပြုချဉ်းကပ်ဆောင်ရွက်နေတာကို ပျော့ကွက်ဟာကွက်လို သဘောထားပြီး တလွဲတချော် တွေးထင်ယူဆနေပုံရပါတယ်။

မြန်မာနိုင်ငံကို ကုလသမဂ္ဂအဖွဲ့ကြီးနဲ့ ကုလသမဂ္ဂရဲ့ အခြားအေဂျင်စီတွေကရော အာဆီယံအဖွဲ့ကပါ အဖွဲ့ဝင်အဖြစ်ကနေ ဆိုင်းငံ့ထားဖို့ ကျနော်အဆိုပြုချင်ပါတယ်။ ဒါ့အပြင် မြန်မာနိုင်ငံမှာ သံရုံးထားရှိတယ်ဆိုရုံလောက် အငယ်တန်း သံအရာရှိတဦး လောက်သာထားရှိပြီး နိုင်ငံအားလုံးကနေ သံတမန်ဆက်ဆံမှုတွေကို အဆင့်လျှော့ချပစ်ရပါ့မယ်။ ထွက်ပြေးခိုလှုံချင်တဲ့ မြန်မာသံတမန်တွေကိုလည်း ခိုလှုံခွင့်ပေးသင့်ပါတယ်။ အလားတူပဲ မြန်မာနိုင်ငံက ထွက်ပြေးလွတ်မြောက်ချင်တဲ့ အရပ်ဘက်နဲ့ စစ်ဘက်က ပုဂ္ဂိုလ်တွေကိုလည်း ထောက်ခံအားပေးသင့်ပါတယ်။

စစ်အေးခေတ်ကာလတလျှောက်မှာ အမေရိကန်၊ ဥရောပနဲ့ ကနေဒါနိုင်ငံတွေဟာ အခုကွယ်ပျောက်သွားပြီဖြစ်တဲ့ ဆိုဗီယက်ပြည်ထောင်စုနဲ့ အရှေ့ဥရောပနိုင်ငံတွေက နိုင်ငံရေးဒုက္ခသည်တွေအတွက် ခိုလှုံစရာပေးခဲ့တယ်။ ဒါဆို မြန်မာအစိုးရနဲ့ သဘောထားကွဲသူတွေနဲ့ ထွက်ပြေးခိုလှုံလာသူတွေကိုရော ဘာကြောင့် ဒီလိုထောက်ခံအားပေးမှုမျိုး မပေးနိုင်ရမှာလဲ။

ဗွီအိုအေတို့ ဘီဘီစီတို့လို အဓိကအသံလွှင့်ဌာနတွေနဲ့ အခြားအသံလွှင့်ဌာနတွေအနေနဲ့လည်း သူတို့ရဲ့ မြန်မာပိုင်း အစီအစဉ်တွေကို သိသိသာသာ တိုးချဲ့ထုတ်လွှင့်သင့်တယ်။

မြန်မာနိုင်ငံ စစ်တပ်ထဲက အစိတ်အပိုင်း အတော်များများဟာ လက်ရှိအခြေအနေနဲ့ ပတ်သက်ပြီး အတော် စိတ်မချမ်းမသာ ဖြစ်နေကြတယ်။ အထူးသဖြင့် ပြီးခဲ့တဲ့ ၂ဝဝ၇ ခုနှစ် စက်တင်ဘာလတုန်းက သူတို့ကိုးကွယ်ဆည်းကပ်ရာ ဗုဒ္ဓဘာသာဘုန်းတော်ကြီးတွေကို ကိုယ်တိုင်ရိုက်နှက်သတ်ဖြတ်ဖို့ အမိန့်ပေးခံရတဲ့နောက်ပိုင်းမှာပါ။

တိုင်းပြည်နဲ့ တပ်မတော်ရဲ့ဂုဏ်သိက္ခာကို ပြန်လည်အဖတ်ဆယ် ကယ်တင်နိုင်ရေးအတွက် တပ်မတော်အရာရှိ အရာခံနဲ့ အကြပ်တပ်သားအားလုံးကို လှုံ့ဆော်စည်းရုံးဖို့အတွက် ဆက်သွယ်ပြန်ကြားရေးနည်းလမ်းပေါင်းစုံကို အသုံးပြုဖို့လိုပါလိမ့်မယ်။ ကိုယ့်တိုင်းပြည်ကို လုယက်ဓားပြတိုက်ပြီး အစုံအပြုံလိုက် သတ်ဖြတ်မှုတွေ ကျူးလွန်နေတဲ့ အိုမင်းရွတ်တွပြီး လောက်တက်ခြစားနေကြတဲ့ လက်တဆုပ်စာ စစ်ဗိုလ်ချုပ်တစုက မိမိတို့တိုင်းပြည်ကြီးကို ဘယ်ပုံဘယ်နည်း ဒုက္ခအန္တရာယ် ကျရောက်အောင် လုပ်နေကြပုံနဲ့ မိမိတို့တတွေ သိက္ခာကျဆင်းနေရပုံတွေကို အဲဒီတပ်ထဲကသူတွေသိအောင် စည်းရုံးပြောပြဖို့လိုတယ်။

မြန်မာ့တပ်မတော်က အရာရှိတွေနဲ့ အကြပ်တပ်သားတွေကို ဒီရာဇဝတ်မှုတွေမှာ ကြံရာပါလို ဖြစ်နေရတဲ့အကြောင်းနဲ့ သူတို့သေနတ်ပြောင်းဝတွေကို ကိုယ့်ပြည်သူတွေဘက် မလှည့်ကြဖို့နဲ့ အဲဒီအိုနာရွတ်တွပြီး၊ လောက်တက်ခြစားနေကြတဲ့ စစ်ဗိုလ်ချုပ်တွေကို ဆန့်ကျင်တော်လှန်ကြဖို့ လိုပြီဆိုတဲ့အကြောင်း ပြောဆိုနားချဖို့လိုပါတယ်။

ဂျာမဏီမှာ အနန္တတန်ခိုးရှင်လို့ ထင်မှတ်မှားလောက်အောင် တန်ခိုးထွားခဲ့တဲ့ အာဏာရှင်ဟစ်တလာကို ဖြုတ်ချဖယ်ရှားဖို့ ကြိုးပမ်းရာမှာ ဟစ်တလာစစ်တပ်က ထိပ်ပိုင်းအရာရှိတွေဟာ ကြီးမားတဲ့ ရဲစွမ်းသတ္တိနဲ့ မျိုးချစ်စိတ်ဓာတ်ကို ဖော်ထုတ်ပြသ ခဲ့ကြပါတယ်။ ၁၉၇၄ ခုနှစ်က ပေါ်တူဂီမှာ ငြိမ်းချမ်းစွာဆင်နွှဲခဲ့တဲ့ ''ဇော်မွှားပန်း တော်လှန်ရေး'' ဆိုတာ ပေါ်ပေါက်ခဲ့တယ်။ အဲဒီတော်လှန်ရေးကြောင့် နှစ် (၅ဝ) ကြာစိုးမိုးခဲ့တဲ့ အာဏာရှင်ဆိုလက်ဇာကို ဖြုတ်ချနိုင်ခဲ့ပြီး ပေါ်တူဂီမှာ ဒီမိုကရေစီ လမ်းကြောင်းကို စတင်လျှောက်လှမ်းနိုင်ခဲ့တယ်။ ဒါ့အပြင် ပင်လယ်ရပ်ခြားက ပေါ်တူဂီကိုလိုနီနိုင်ငံတွေကိုလည်း လွတ်လပ်ရေးရစေခဲ့တယ်။ အဲဒီတော်လှန်ရေးရဲ့ ဗိသုကာတွေကတော့ ပေါ်တူဂီစစ်တပ်က အရာရှိငယ်တွေပါပဲ။ ဒါကြောင့် မြန်မာ့တပ်မတော်အရာရှိငယ်တွေကိုလည်း သူတို့ရဲ့ဂုဏ်သိက္ခာနဲ့ မျိုးချစ်စိတ်ဓာတ်ရှိမှုကို စံနမူနာပြတဲ့အနေနဲ့ မိမိတို့တိုင်းပြည်ကို ကယ်တင်ကြဖို့ လှုံ့ဆော်စည်းရုံးနိုင်ပါတယ်။

ကမ္ဘာ့ဘဏ်၊ အာရှဖွံ့ဖြိုးရေးဘဏ်၊ အပြည်ပြည်ဆိုင်ရာ ငွေကြေးရန်ပုံငွေအဖွဲ့နဲ့ ကုလသမဂ္ဂအေဂျင်စီတွေအနေနဲ့ မြန်မာနိုင်ငံစီးပွားရေး ပြန်လည်နာလန်ထူရေးနဲ့ ငွေကြေးစနစ် ပြန်လည်ထူထောင်ရေးအတွက် လေ့လာစူးစမ်းမှုတွေပြုလုပ်ရေးနဲ့ စီမံကိန်းမူကြမ်းတရပ်ရေးဆွဲရေးကို နှောင့်နှေးကြန့်ကြာမှုမရှိဘဲ အမြန်ဆုံးစတင်ဆောင်ရွက်ဖို့လိုပါတယ်။

လွတ်လပ်မှုတွေ ပြန်လည်ရရှိလာတဲ့အခါ ပြန်လည်ထူထောင်ရေးနဲ့ နိုင်ငံရေးတည်ငြိမ်မှုအတွက် လျှောက်လှမ်းရမယ့် ခရီးလမ်းဟာ အလွန်ကြမ်းတမ်းရှည်လျားနေဦးမှာပါ။ မြန်မာနိုင်ငံဟာ တိုင်းရင်းသားလူမျိုးစုအက်ကြောင်းတွေနဲ့ အက်ရာကွဲရာ ဗရပွဖြစ်နေသလို လက်နက်ကိုင် ဘိန်းရာဇာတွေရဲ့ ဖိစီးနှိပ်စက်မှုကိုလည်း ခါးစည်းခံနေရတဲ့ တိုင်းပြည်တပြည်ပါ။

တိုင်းပြည်တည်ငြိမ်မှုနဲ့ စည်းလုံးညီညွတ်မှုကို ထိန်းသိမ်းစောင့်ရှောက်ရေးမှာ စစ်တပ်ဟာ ပစ်ပယ်ရှောင်လွှဲလို့မရနိုင်တဲ့ အခန်းကဏ္ဍမှာ ဆက်လက်ရှိနေဦးမယ်ဆိုတာ ဘယ်လိုမှမငြင်းနိုင်တဲ့ အချက်ပါ။ ဒါကြောင့် မြန်မာနိုင်ငံမှာ နောင်ပေါ်ထွန်းလာမယ့် စစ်အရာရှိတွေအနေနဲ့ သူတို့မှာ တိုင်းပြည်ကို ကယ်တင်ဖို့နဲ့ ဒေါ်အောင်ဆန်းစုကြည်နဲ့ အတူလက်တွဲပြီး ကမ္ဘာမှာ မြန်မာအတွက် နေရာပြန်ရအောင် ဆောင်ရွက်သွားဖို့ သမိုင်းပေးတာဝန်တရပ် ရှိနေတယ်ဆိုတာ သိနားလည်ဖို့လိုပါတယ်။

ဒါပေမယ့် စစ်တပ်နဲ့ ရဲအဖွဲ့ကို ပြန်လည်ဖွဲ့စည်းပြီး ခေတ်မီတိုးတက်အောင် လုပ်ရမှာဖြစ်ပါတယ်။ ဒီအတွက် မြန်မာ့အိမ်နီးချင်း တွေနဲ့ မိတ်ဆွေတွေက ကူညီပံ့ပိုးဆောင်ရွက်ပေးဖို့ အဆင်သင့်ရှိနေရပါမယ်။

မြန်မာနိုင်ငံရဲ့ လွန်ခဲ့တဲ့အနှစ် (၂ဝ) ကျော်အတွင်း ဖြစ်ထွန်းမှုတွေကို စေ့ငုသုံးသပ်ကြည့်ပြီးတဲ့နောက် တဖန် ကိုယ့်ပြည်သူတွေအပေါ် ထိန်းထိန်းသိမ်းသိမ်း ညှာညှာတာတာ ဆက်ဆံပြုမူဖို့နဲ့ ပြဿနာရပ်တွေကို တွေ့ဆုံဆွေးနွေး အဖြေရှာဖို့ စစ်အုပ်စုခေါင်းဆောင်တွေကို အကောင်းဘက်က ရှုမြင်ပြီး ယဉ်ကျေးသိမ်မွေ့စွာ ဆက်ဆံပြောဆိုစည်းရုံးမှုတွေ မရေမတွက်နိုင်အောင် ပြုလုပ်ခဲ့ပေမယ့် အဲဒီကြိုးပမ်းအားထုတ်မှုတွေအားလုံး အရာမထင်ဖြစ်ခဲ့တာတွေကို တွေ့မြင်ခဲ့ရပြီးတဲ့နောက် ကျနော်ယုံကြည်မိတာကတော့ ကိုယ့်ပြည်သူတွေအပေါ် ဆင်နွှဲခဲ့တဲ့ စစ်ပွဲအတွက် စစ်ဗိုလ်ချုပ်တွေဘက်က တန်ဖိုးတစုံတရာ ပြန်လည်ပေးဆပ်ဖို့အတွက် အရေးယူဆောင်ရွက်မှုတွေ လက်တွေ့ကျကျ အရှိန်မြှင့်ဆောင်ရွက်သွားဖို့ လိုနေပြီဆိုတာပါပဲ။

သံခင်းတမန်ခင်းအတွက်တော့ တံခါးတွေ ဆက်ဖွင့်ထားရပါလိမ့်မယ်။ အကယ်၍သာ အသိတရားတွေဝင်လာပြီး စစ်အာဏာပိုင်တွေက ဒေါ်အောင်ဆန်းစုကြည်နဲ့တကွ အခြားနိုင်ငံရေးအကျဉ်းသားတွေကို လွှတ်ပေးလိုက်မယ်ဆိုရင် နိုင်ငံတကာမိသားစုကြီးရဲ့ အူလှိုက်သဲလှိုက် ချီးကျူးထောပနာပြုသံတွေကို သူတို့ကြားလာရမှာပါ။ ဒါ့အပြင် အကယ်၍သာ ဒေါ်အောင်ဆန်းစုကြည်နဲ့အတူ အခြားခေါင်းဆောင်တွေနဲ့ပါ အဓိပ္ပာယ်ရှိတဲ့ တွေ့ဆုံဆွေးနွေးမှုတွေ ပြုလုပ်ပြီး အဲဒီကတဆင့် အပြုသဘောဆောင်တဲ့ နောက်ထပ်ခြေလှမ်းတရပ်ကို သူတို့ဆက်လှမ်းကြမယ်ဆိုရင် နိုင်ငံတကာမိသားစုကြီးက ခိုင်မာတဲ့ ထောက်ခံအားပေးမှုတွေ ချက်ချင်းလက်ငင်းပေးလာကြမှာပါ။

အကယ်၍သာ စစ်တပ်နဲ့ ဒေါ်အောင်ဆန်းစုကြည်တို့ကြား လွတ်လပ်ပြီး ဒီမိုကရေစီနည်းလမ်းကျတဲ့ ရွေးကောက်ပွဲတွေပြုလုပ်ဖို့ သဘောတူညီချက်တရပ်ရရှိပြီး စစ်တပ်အနေနဲ့ ရွေးကောက်ပွဲရလဒ်အတိုင်း လိုက်နာဆောင်ရွက်သွားမယ်ဆိုရင် နိုင်ငံတကာက ဝိုင်းဝန်းထောက်ပံ့ဖို့ ကတိကဝတ်ပြုရေး ညီလာခံကြီးတရပ် ကျင်းပပြုလုပ်ရပါလိမ့်မယ်။ အဲဒီညီလာခံမှာ ကမ္ဘာ့မိသားစုအသိုင်းအဝိုင်းကြီးကနေ မြန်မာ့စီးပွားရေး ပြန်လည်နာလန်ထူနိုင်အောင် ကူညီထောက်ပံ့ဖို့အတွက် ကတိကဝတ်တွေ ပေးကြပါလိမ့်မယ်။ ဒီနေရာမှာ ငြိမ်းချမ်းရေး၊ တည်ငြိမ်ရေးနဲ့ ကြွယ်ဝချမ်းသာရေးအတွက် လျှောက်လှမ်းရမယ့်ခရီးလမ်းဟာ အလွန်ရှည်လျား ထွေးပြားနိုင်တယ်ဆိုတာကိုတော့ ကျနော်တို့ ကြိုတင်တွက်ဆထားရပါလိမ့်မယ်။

မှတ်ချက် ။ ။ ၂ဝဝ၉ ခုနှစ် သြဂုတ်လ (၁၉) ရက်နေ့ထုတ် The Huffington Post သတင်းစာတွင် “In Support of the Struggle for Democracy in Burma” ခေါင်းစဉ်ဖြင့် အရှေ့တီမောသမ္မတ ရာမို့စ်ဟော်တာ ရေးသားခဲ့သည့် ဆောင်းပါးကို တိုက်ရိုက်ပြန်ဆိုထားခြင်းဖြစ်ပါသည်။
http://www.khitpyaing.org/