တိုက်ပွဲဝင်ရဦးမည်

ကျွန်ုပ်တို့၏ ဒီမိုကရေစီတိုက်ပွဲသည် အနှစ်(၂၀) ကျော်ခဲ့ပေပြီ၊ မပီးဆုံးနိုင်သေး၊ ဒီတိုက်ပွဲပီးဆုံးမှဖြစ်မည်၊ ဒီတိုက်ပွဲနိုင်မှဖြစ်မည်၊ ဒီတိုက်ပွဲမှာ ကျွန်ုပ်ကိုယ်တိုင်ပါဝင်ဆင်နွဲရမည်၊ သင်ကိုယ်တိုင်ပါဝင်ဆင်နွဲရမည်၊ ရှောင်တိမ်းပုန်းအောင်နေလို့မဖြစ်၊ ကျွန်ုပ်တို့ သင်တို့လက်ထက်မှာ တာဝန်မကျေခဲ့လျှင် နောင်တက်လာမဲ့ ကျွန်တော်တို့မျိုးဆက်သစ်တွေ ကျွန်တော်တို့ထက် အဆပေါင်းများစွား ဆိုးရွားနိမ့်ကျသွားတော့မည်။

စစ်အာဏာရှင်သည် ပြည်သူကို ကျွန်လိုသဘောထားသည့် စနစ်တစ်ခုဖြစ်သည်၊ စစ်တပ်ကို ဖားမှ စစ်တပ်ကိုအဖေခေါ်မှ သူတို့ကချကျွေးသည့် အရိုးအယွင်းများကို စားသောက်ရသည့် ဘ၀မျိုးဖြစ်ပေသည်၊ လူတစ်ယောက်မှာ ရှိတဲ့ အရည်အချင်းကို အပြည့်အ၀ ထုတ်သုံးပိုင်ခွင့်မရှိ၊ ခိုင်းတာလုပ် ထားရာနေ စေရာသွား ခံမပြောနဲ့ ဆိုသည့် အဆင့်အတန်းနိမ့်ကျသည့် စနစ်တစ်ခုဖြင့်အသက်ရှင်သန်ကြရပေမည်။

လူသားတစ်ယောက်ရဲ့မွေးရာပါ အခွင့်အရေးတစ်ရပ် လက်လွတ်ဆုံးရှုံးသည့် ဘ၀မျိုးကိုပိုင်ဆိုင်ရမည်၊ ဒီနိုင်ငံမှာမွေးပီး လူဖြစ်လာတာချင်းအတူတူ ဒီနိုင်ငံက ရသင့်ရထိုက်သည့်အခွင့်အရေးများကို တန်းတူညီတူ လုပ်ပိုင်ခွင့် ခံစားပိုင်ခွင့်မရှိ၊ အာဏာရှိသူလူတစ်စုကသာ အခွင့်ထူးခံလူတန်းစားတစ်ရပ်အဖြစ်ဖြင့် အဖိနှိပ်ခံ အနှိမ်ခံဘ၀မျိုးနှင့် ရင်ဆိုင်ကြုံတွေ့ခံစားကြရပေမည်။

ဒီလိုဆိုးဝါးတဲ့ အမွေအနှစ်တွေကို သင့်ရဲ့ မျိုးဆက်တွေအတွက် လက်ဆင့်ကမ်းရက်ခဲ့ပါသလား၊ ဒါမှမဟုတ် ကိုယ်လွတ်မြောက်ရင် ပီးရောဆိုတဲ့ တစ်ကိုယ်ကောင်းစိတ်ဓာတ်မျိုးနဲ့ တာဝန်မဲ့သူတစ်ယောက်အဖြစ်ခံမလား စဉ်းစား ဆုံးဖြတ်လုပ်ကိုင်ရတော့မဲ့ အချိန်ကျရောက်နေပီဖြစ်သည်၊

လူတိုင်းလူတိုင်းသည် လွတ်လပ်ခြင်းကို လိုလားတောင့်တကြသည်၊ အေးချမ်းတည်ငြိမ်သည့်ဘ၀မျိုးကို ပိုင်ဆိုင်လိုကြသည်၊ သို့သော် မြန်မာနိုင်ငံမှာတော့ အထင်နှင့်အမြင် တစ်ခြားစီဖြစ်နေပေလိမ့်မည်၊ အရာရာအားလုံးကို စစ်အာဏာရှင်က လက်ဝါးကြီးအုပ်ကာ မောင်ပိုင်စီးထားသောကြောင့် ပြည်သူတွေရဲ့ဘ၀မှာ မသေရုံတစ်မယ် ယဲ့ယဲ့လေးသာကျန်ရှိတော့သည်၊ စားကောင်းခြင်းမစားရ၊ အိပ်ကောင်းခြင်းမအိပ်ရ၊ လူမှုဒုက္ခငရဲခန်းကြီးထဲမှာ နေ့စဉ်နှင့်အမျှ ရုန်းကန်ရှာဖွေနေကြရသည်၊ စစ်ဗိုလ်ချုပ်တွေ ဗိုလ်ချုပ်ကတော်တွေမှာတော့ နောက်ဆုံးပေါ်ကား၊ တိုက်၊ပြည်သူ့ဘဏ္ဍာပစ္စည်းတွေနဲ့ စည်းစိမ်ခံကာ ယစ်မူးချင်တိုင်းယစ်မူးနေကြပေသည်။ တိုင်းပြည်သည် တပ်မတော်အတွက်မဟုတ် တပ်မတော်သည် တိုင်းပြည်အတွက်ဖြစ်ရမည် ဆိုသည့် ဗိုလ်ချုပ်ချမှတ်ခဲ့သည့် ဆောင်ပုဒ်လဲ စာအုပ်ထဲမှာ ကျန်နေရစ်ပီဖြစ်သည်။

ဒီမိုကရေစီနှင့် လူအခွင့်အရေးလိုချင်ရင် ဒီအတိုင်းထိုင်နေလို့မရ၊ ထိုင်နေရုံနဲ့ဘာမှဖြစ်မလာနိုင်၊ တောင်းဆိုနေလို့လဲ အကျိုးရှိလာမည်မဟုတ်၊ ဒီတော့ လူတိုင်းမှာ တာဝန်ကိုယ်စီရှိကြသလို တာဝန်ကျေပြွန်ဖို့လဲအထူးလိုအပ်ပေသည်။မိမိတတ်စွမ်း
နိုင်သည့်ဖက်ကနေလုပ်ဆောင်ဖို့ကသာ အရေးကြီးဆုံးဖြစ်ပေသည်။ မိမိမျိုးဆက်သစ်တွေကို အခြားသောအမွေအနှစ်တွေ မပေးနိုင်ခဲ့ဦးတော့ အာဏာရှင်ကို တော်လှန်ဖို့ နှင့် မတရားမှုတွေကို ခေါင်းငုံ့မခံသည့် စိတ်ဓာတ်အမွေကိုတော့ အနည်းဆုံးပေးထားရစ်နိုင်အောင်ကြိုးစားကြရပေမည်။

နိုင်ငံတစ်ခု၏ ကောင်းမွေ ဆိုးမွေသည် ရှေ့ဆောင်လမ်းပြ လူကြီးသူကြီးများအပေါ်များစွားတည်မှီနေပေသည်၊ လူငယ်လူရွယ်များသည် ၄င်းတို့ပေးခဲ့သောအမွေကို တစ်ပွေ့တစ်ပိုက် ရယူကြရပေသည်။ ယနေ့ နိုင်ငံကိုအုပ်ချုပ်နေပါသည်ဆိုသော နအဖ စစ်အာဏာရှင်တို့သည် လူငယ်လူရွယ်တို့အား မကောင်းသည့်စိတ်ဓာတ်များရိုက်သွင်းကာ တိုင်းပြည်ကို နည်းအမျိုးမျိုးနှင့် ဖျက်ဆီးချင်တိုင်း ဖျက်ဆီးပြနေကြပေသည်၊ မိမိတို့ကိုးကွယ်သည့် ဘာသာ သာသနာအပေါ်မှာလဲ လှန်လိုလှန် မှောက်လိုမှောက်နဲ့ ဘုရား တရား သံဃာမှန်းလဲ မသိကြတော့၊ သာသနာတော်ကြီးတစ်ခုလုံးကလဲ နအဖရဲ့ အသုံချခံပစ္စည်းကြီးတစ်ခုလို ဖြစ်ချင်တိုင်းဖြစ် ပျက်ချင်တိုင်း ပျက်စီးနေပေပြီဖြစ်သည်။ အာဏာနှင့် ငွေရှိလျှင် ဘာမဆို ဖြစ်သည်ဟူသော အတွေးအခေါ် အယူအဆဆိုးတွေကို လူငယ်လူရွယ်တွေကို လက်ဆင့်ကမ်းသင်ယူစေသည်၊ အလေအလွင့်တွေကို ပြုပြင်ထိန်းသိမ်းစောက်ရှောက်ရမည့်အစား မက်လုံးခြောက်လုံးပေးကာ ညစ်ပတ်ကောက်ကျစ်သည့် စိတ်ဓာတ်ဆိုးတွေကို စနစ်တကျ သင်ကြားပေးနေပေသည်။

ဒီနိုင်ငံရဲ့အနာဂတ်ရှေ့ရေးအလားအလားသည် မတွေးရဲစရာဖြစ်လာသည်၊ ဒီတော့ ကျွန်ုပ်တို့ ဒီအတိုင်း နေလို့တော့ မဖြစ်တော့၊ ဒီစစ်အာဏာရှင်စနစ်ဆိုးကြီး မရှိမှ တိုင်းပြည်၏ အနာဂတ်သည် သာယာလှပနိုင်ပေမည်၊ ကမ္ဘာအလယ်မှာ လူတစ်လုံး သူတစ်လုံးအဖြစ်နဲ့ နိုင်ငံတကာနှင့် ရင်ဘောင်တန်းနိုင်မည်ဖြစ်ပေသည်။ စစ်အာဏာရှင်ပြုသမျှကို ခေါင်းငုံ့ခံနေကြဦးမည်ဆိုပါက နောက်ထပ် လာမည့် ကျွန်ုပ်တို့ မျိုးဆက်တို့သည် စစ်ကျွန်အဖြစ်နဲ့ နွံနစ်ကာ သံသရာထဲ တ၀ဲလည်လည် ဖြစ်နေကြဦးမည်သာဖြစ်ပေသည်။

ကျွန်ုပ်တို့သည် ကျွန်ုပ်တို့မျိုးဆက်သစ်တို့အတွက် စစ်အာဏာရှင်ကို တိုက်ပွဲဝင်ကြရဦးမည်။

ကျွန်ုပ်တို့သည် ကျွန်ုပ်တို့ လွတ်လပ်ရေးအတွက် စစ်အာဏာရှင်ကို တိုက်ပွဲဝင်ကြရဦးမည်။

ကျွန်ုပ်တို့သည် ကျွန်ုပ်တို့အခွင့်အရေးများအတွက် စစ်အာဏာရှင်ကို တိုက်ပွဲဝင်ကြရဦးမည်။

တက္ကသိုလ်သောတုဇနဘိက္ခု (ရန်ကုန်)