စားအုန်းဆီမှ ဦးပိုင် အမြတ်အစွန်းများစွာ ရနေ
NEJ/ ၁၈ နိုဝင်ဘာ ၂၀၀၈
line
နိုင်ငံတကာ၌ စားအုန်းဆီဈေးများ ထိုးကျနေသော်လည်း ပြည်တွင်းကို စားအုန်းဆီများ လက်ဝါးကြီးအုပ်ပြီး တင်သွင်းနေသည့် မြန်မာ့စီးပွားရေး ဦးပိုင်လီမိတက်က ဈေးနှုန်းမြှင့်တင်ထားသည့်အတွက် အမြတ်အစွန်းများစွာ ရနေကြောင်း ပြည်တွင်း ဆီကုန်သည်များက ပြောပြကြသည်။
ဘုရင့်နောင် ပွဲရုံတန်းမှ ဆီကုန်သည်တဦးက “အခုဆိုရင် မလေးရှား စားအုန်းဆီဟာ ရန်ကုန်ဆိပ်ကမ်းအရောက် တပိဿာကို မြန်မာကျပ်ငွေ (၁,၁၉၅) ကျပ်နှုန်းပဲ ရှိတော့တယ်။ အဲဒါကို ဦးပိုင်လီမိတက်က လက်ဝါးကြီးအုပ်ပြီး တပိဿာကို (၂,၂၅၂) ကျပ်ဈေးနဲ့ ဖြန့်တယ်။ တပိဿာကို ကျပ် (၁,ဝဝဝ) ကျော် အမြတ်ယူထားတယ်။ ဦးပိုင်ဟာ ပြည်တွင်းဆီ ကုန်သည်တွေဆီကို တပတ် တပတ်ကို ဆီပိဿာချိန်ပေါင်း (၁ဝ) သိန်းလောက် ဖြန့်ဖြူးတယ်။ လက်ရှိ ပေါက်ဈေးနှုန်းနဲ့ တွက်ကြည့်ရင် စားအုန်းဆီ ဖြန့်ဖြူးရာကနေ တပတ်ကို ကျပ်ငွေ သန်းတစ်ထောင် (တစ်ဘီလီယံ) လောက် အမြတ်ရနေတာ တွေ့နိုင်တယ်”ဟု ပြောသည်။
မြန်မာနိုင်ငံမှာ စားအုန်းဆီ တင်သွင်းဖြန့်ဖြူးမှုကို မြန်မာ့စီးပွားရေး ဦးပိုင်လီမိတက်က လက်ဝါးကြီးအုပ် လုပ်ကိုင်နေပြီး တခါတရံ ဦးပိုင်လီမိတက်၏ ခွင့်ပြုချက်ဖြင့် ပြည်တွင်းစီးပွားရေးကုမ္ပဏီများက တင်သွင်းခွင့်ရသည်။ ထိုသို့ တင်သွင်းခွင့်ရသူများသည် များသောအားဖြင့် ထိပ်တန်းအာဏာပိုင် အသိုင်းအဝန်း မိသားစုဝင် ကုမ္ပဏီများသာ ဖြစ်ကြောင်း သိရသည်။
ဦးပိုင်လီမိတက်သည် နိုင်ငံခြားက ဝယ်ယူတင်သွင်းလာသည့် စားအုန်းဆီများကို ဈေးနှုန်းတခု သတ်မှတ်ပြီး ပြည်တွင်းက ၎င်းတို့ အသိအမှတ်ပြု ဆီကုန်သည် ကိုယ်စားလှယ်များကို ခွဲတမ်းစနစ်ဖြင့် ဖြန့်ဖြူးပေးသည်။ လောလောဆယ် ရန်ကုန်မှာ ဆီကုန်သည် ကိုယ်စားလှယ် (၃,ဝဝဝ) လောက်ရှိပြီး တဦးကို (၁၁၆) ပိဿာဝင် စားအုန်းဆီ ပီပါ (၃) လုံးစီ ဖြန့်ဖြူးရောင်းချပေးသည်။
မြန်မာနိုင်ငံက တင်သွင်းနေသည့် မလေးရှားနိုင်ငံ ဈေးကွက်မှာ ပြီးခဲ့သည့် ၂ဝဝ၈ ဇူလိုင်လတွင် စားအုန်းဆီ တတန် (၉၈၂) ဒေါ်လာခန့် ပေါက်ဈေးရှိရာမှ လက်ရှိ နိုဝင်ဘာတွင် တတန် (၄၂၆) ဒေါ်လာအထိ ကျဆင်းသွားသည်။ ဈေးနှုန်း ထက်ဝက် (၅ဝ ရာခိုင်နှုန်း) မက ကျဆင်းသွားခြင်းဖြစ်သည်။
သို့သော် မြန်မာဈေးကွက်ကို လက်ဝါးကြီး အုပ်ထားသည့် ဦးပိုင်လီမိတက်မှာမူ စားအုန်းဆီ ခွဲတမ်းဈေးကို နိုင်ငံတကာ ပေါက်ဈေးနှင့်အညီ ချမပေးခဲ့ကြောင်း၊ ဦးပိုင်က ဖြန့်ဖြူးသည့်ဈေးသည် ပြီးခဲ့သည့် ၂ဝဝ၈ သြဂုတ်လက စားအုန်းဆီ တပိဿာ ကျပ် (၂,၅ဝဝ) ခန့် ရှိခဲ့သော်လည်း လက်ရှိ (၂,၂၅၂) ကျပ်နှုန်းဖြင့်သာ အနည်းငယ်လျော့ချပြီး ဖြန့်ဖြူးနေခြင်း ဖြစ်သည်။
စားအုန်းဆီ လက်ဝါကြီးအုပ်တင်သွင်းသည့် မြန်မာ့စီးပွားရေး ဦးပိုင်လီမိတက်နှင့် ဗိုလ်ချုပ်သားသမီးများပိုင် ကုမ္ပဏီများသည် တလ တလကို ကျပ်ငွေ (၄) ဘီလီယံခန့် အမြတ်အစွန်းရနေကြောင်း ကုန်သည်များက သုံးသပ်နေကြသည်။
ပြည်တွင်း၌ ယခုကဲ့သို့ စားအုန်းဆီ ဈေးနှုန်းများ ကျသင့်သလောက် မကျသည့်အတွက် ထိုင်းနိုင်ငံကနေ ပုဇွန်နှစ်ကောင် တံဆိပ်အပါအဝင် စားအုန်းဆီများ ဈေးသက်သက်သာသာ ဖြင့် နယ်စပ်လမ်းမှတဆင့် ဝင်လာနေသည်။ ထိုကြောင့် အာဏာပိုင်များသည် နယ်စပ်မှတဆင့် စားအုန်းဆီ တင်သွင်းခွင့် လုံးဝ မပေးသည့်အပြင် ဘားအံ-ရန်ကုန်၊ မော်လမြိုင်- ရန်ကုန် ကားလမ်းတလျှောက်၌ အကြီးအကျယ် စစ်ဆေးပြီး စားအုန်းဆီများကို ဖမ်းဆီးနေကြောင်း တွေ့မြင်ရသည်။
ယခုနောက်ပိုင်း အမြန်အစွန်းများသည့် ပြည်တွင်းစားအုန်းဆီ တင်သွင်းခွင့်နှင့် ပတ်သက်၍ ဗိုလ်ချုပ်မှူးကြီးသန်းရွှေ၏ ဇနီး ဒေါ်ကြိုင်ကြိုင်ပိုင် ကုမ္ပဏီက စီမံခန့်ခွဲနေသည်ဟု ဈေးကွက်အတွင်း ကျယ်ကျယ်ပြန့်ပြန့် သတင်းဖြစ်ပေါ်နေသော်လည်း သီးခြား အတည်ပြုနိုင်ခြင်း မရှိသေးပေ။
Tuesday, November 18, 2008
စားအုန်းဆီမှ ဦးပိုင် အမြတ်အစွန်းများစွာ ရနေ
Subscribe to:
Post Comments (Atom)
0 comments:
Post a Comment