နိဂုံးမတိုင်မီ

နိဂုံးမတိုင်မီ
အောင်ဇော် | အောက်တိုဘာ ၈၊ ၂၀၀၈

ထိုကာလ တခဏတာမျှတွင် စစ်အစိုးရက အနောက်နိုင်ငံများနှင့် ပြန်ပေါင်းထုပ်တော့မယောင် ရှိနေခဲ့သော်လည်း ထောက်လှမ်းရေး အကြီးအကဲ ဗိုလ်ချုပ်ကြီးခင်ညွန့်ဖြုတ်ချခံရပြီးနောက်တွင် ဤကိစ္စများ အားလုံး နိဂုံးချုပ်ခဲ့ရတော့သည်။

ယခင် ထောက်လှမ်းရေး အရာရှိဟောင်း ဗိုလ်မှူးအောင်လင်းထွဋ်

၂၀၀၀ ပြည့်နှစ် အစောပိုင်းကာလတွင် ဗိုလ်မှူးအောင်လင်းထွဋ်က ၀ါရှင်တန်ဒီစီရှိ မြန်မာနိုင်ငံ သံရုံးတွင် ဒုတိယတာဝန်ခံ အဖြစ် ရာထူးသစ် စတင်ထမ်းဆောင်ခဲ့ ရချိန်နှင့် တပြိုင်နက် အသစ်တက်လာမည့် သမ္မတသစ် ဂျော့ဘုရှ်ဦးဆောင်သည့် အမေရိကန်ပြည်ထောင်စု အစိုးရနှင့် ဆက်ဆံရေး ပြန်လည်တိုးတက် ကောင်းမွန် အောင် ဆောင်ရွက်ရန် တာဝန်ပေးအပ် ခံခဲ့ရသည်။

သူက ယခုတကြိမ်မှ အမေရိကန်ပြည်ထောင်စု၏ မြို့တော်သို့ ရောက်ခဲ့ဖူးသည် မဟုတ်။ ၁၉၈၇ ခုနှစ်တွင် မြန်မာနိုင်ငံ၏ ထိပ်သီး စစ်တက္ကသိုလ် (ဒီအက်စ်အေ) မှ ကျောင်းပြီး အမေရိကန်နိုင်ငံ ထောက်လှမ်းရေးအဖွဲ့ (စီအိုင်အေ) ထံတွင်
၃ လ သင်တန်းတက်ရန် ပို့လွှတ်ခံရစဉ်ကလည်း ၀ါရှင်တန်သို့ သူ ရောက်ရှိ နေထိုင်ခဲ့ဖူးသည်။

၂၀၀၀ ပြည့်နှစ်တွင် အမေရိကန်ပြည်ထောင်စုသို့ ပြန်ရောက်လာသည့်အခါ ဗိုလ်မှူးအောင်လင်းထွဋ်က တပ်မတော် ထောက်လှမ်းရေး ညွှန်ကြားရေးမှူးရုံး (အိုစီအမ်အိုင်) ၏ တန်ပြန်ထောက်လှမ်းရေးအရာရှိအဖြစ် တာဝန်ယူနေရစဉ် ဖြစ်သည်။ သူ၏ အကြီးအကဲက ဗိုလ်ချုပ်ကြီးခင်ညွန့်ဖြစ်ပြီး နိုင်ငံတော်အေးချမ်းသာယာရေးနှင့် ဖွံ့ဖြိုးရေးကောင်စီ (နအဖ) စစ်အစိုးရ၏ အတွင်းရေးမှူး ၁ တာဝန်ယူထားသူလည်း ဖြစ်သည်။ ဗိုလ်ချုပ်ကြီးခင်ညွန့်က တပြိုင်နက်တည်းမှာပင် ထောက် လှမ်းရေး ဌာနများကိုလည်း ကွပ်ကဲနေသည်။

ဗိုလ်ချုပ်ခင်ညွန့်က တိုင်းရင်းသားသူပုန် အင်အားစုများနှင့် ဆက်တိုက်ဖြစ်ပေါ်လာခဲ့သည့် အပစ်အခတ်ရပ်စဲရေး သဘော တူညီချက်များကို အစပျိုးဆောင်ရွက်ခဲ့သူလည်း ဖြစ်သည်။ သူက ဤနည်းအားဖြင့် စစ်အစိုးရ၏ အာဏာထိန်းချုပ်မှုကို ပိုမို ခိုင်မြဲစေခဲ့ပြီး နောက်ဆယ်စုနှစ်တိုင် ဆက်လက်၍ အာဏာကို ချုပ်ကိုင်ထားနိုင်ရန် ဖန်တီးခဲ့သူလည်း ဖြစ်သည်။

ဗိုလ်မှူးအောင်လင်းထွဋ်၏ အဆိုအရ အမေရိကန်တွင် သမ္မတဘုရ်ှတက်လာချိန်၌ ဗိုလ်ချုပ်ခင်ညွန့်က စစ်အစိုးရအပေါ် အပြင်းထန်ဆုံး ဝေဖန်ပြစ်တင် ပြောဆိုနေသည့် အင်အားကြီးနိုင်ငံနှင့် တင်းမာမှုများ လျော့ပါးရေး ဆောင်ရွက်နိုင်လိမ့်မည် ဟု ယုံကြည်နေခဲ့ပုံရသည်ဟု ဆိုသည်။

“ကျနော်တို့က ဘုရှ် အာဏာရလာတဲ့အချိန်ကို စောင့်နေတယ်။ နောက်ပိုင်း ဒီစီမှာ ဆက်ပြီး စည်းရုံးရေး လုပ်ငန်းတွေ စတော့တာပဲ” ဟု ဗိုလ်မှူးအောင်လင်းထွဋ်က ဆိုသည်။

ဧရာဝတီမဂ္ဂဇင်းက အသေးစိတ် မေးမြန်းခဲ့သည့် အင်တာဗျူးတွင် ၎င်းဗိုလ်မှူးဟောင်းက မကြာသေးမီကမှ ဖြစ်ပေါ်ခဲ့သည့် မြန်မာနိုင်ငံ၏ အတွင်းကျကျ အတိတ်သမိုင်း ဖြစ်ရပ်များကို ဖော်ထုတ်ပြောကြားခဲ့သည်။ ထိုအချိန်က စစ်အစိုးရ အနေနှင့် အနောက် နိုင်ငံများနှင့် ဆက်ဆံရေးတွင် စာမျက်နှာအသစ်ဖွင့်ရန် ပြင်ဆင်ထားခဲ့ပုံရသည်ဟု သူကပြောသည်။

သို့သော်လည်း သူ၏ ပြောကြားချက်အရ ထိုအချိန်က စစ်အစိုးရအတွင်းတွင်လည်း အာဏာအားပြိုင်မှု အကြီးအကျယ် ရှိနေခဲ့သည်ဟု ဆိုသည်။

ဗိုလ်ချုပ်ခင်ညွန့်က အမေရိကန်ပြည်ထောင်စု အပါအ၀င် အနောက်နိုင်ငံများနှင့် ဆက်ဆံရေးပြန်လည် ကောင်းမွန်စေရေး အတွက် စမ်းသပ်မှု မပြုရမီတွင် သူက စစ်အစိုးရ၏ ထိပ်သီးအကြီးအကဲ ဗိုလ်ချုပ်မှူးကြီးသန်းရွှေ မီးစိမ်းပြသည်ကိုလည်း စောင့်နေရသေးသည်။

နောက်ဆုံး ဆုံးဖြတ်ချက်ကို အမြဲတစေ ချမှတ်ရသူဖြစ်သည့် အာဏာရှင် ဗိုလ်ချုပ်မှူးကြီးသန်းရွှေက လွယ်လွယ် ဖြောင်းဖြ မရနိုင်သည့် ခေါင်းမာသူတဦးဖြစ်သည့်အပြင် သူက ဗိုလ်ချုပ်ခင်ညွန့် ဆောင်ရွက်ချင်သည့် ကျေအေးပြေလည်စေရေး အပြုအမူ များကိုလည်း သိပ်သဘောကျ ကျေနပ်လှသူ မဟုတ်။ သို့သော်လည်း ထောက်လှမ်းရေးအကြီးအကဲ ဗိုလ်ချုပ်ကြီး ခင်ညွန့် က ယခင် သူပုန်အဖွဲ့များကို အပစ်အခတ်ရပ်စဲရေးဖြင့် ထိန်းချုပ်ထားလိုက်နိုင်ပြီ ဖြစ်သောကြောင့် စစ်အစိုးရက ၎င်း၏ အပြတ်ချေမှုန်းရေး စစ်ပွဲများကို ဒီမိုကရေစီ အတိုက်အခံ အင်အားစုများသို့ လှည့်၍ ဆင်နွှဲရေးအတွက် အလေးပေး စဉ်းစားချိန် ရလာစေခဲ့သည်။ ဗိုလ်ချုပ်ခင်ညွန့်၏ ကောက်ကျစ်ပါးနပ်သည့် ဉာဏ်စွမ်းဖြင့် အတိုက်အခံ အင်အားစုများကို ကောင်းကောင်း ထိန်းချုပ် ထားနိုင်ကြောင်း လက်တွေ့ပြသခဲ့ပြီ ဖြစ်သောကြောင့်လည်း နောက်ဆုံး ဗိုလ်ချုပ်မှူးကြီး သန်းရွှေက ခွင့်ပြုမိန့် ချပေးခဲ့သည်။ ၎င်း၏ မှော်မျက်လှည့်အစွမ်းကို ၀ါရှင်တန်တွင် အစွမ်းပြရန် ခွင့်ပြုပေးခဲ့သည်။

ဗိုလ်မှူးအောင်လင်းထွဋ်ကို ၀ါရှင်တန်သို့ တာဝန်ပေး စေလွှတ်ခဲ့ခြင်းမှာ လုပ်ငန်း ပထမအဆင့်ဖြစ်ပြီး နောက်ပိုင်းတွင် နိုင်ငံ တကာအစိုးရများက မြန်မာစစ်အစိုးရအား ၀ိုင်းကျဉ်နေမှုကို အဆုံးသတ်စေမည်ဟု မျှော်မှန်းထားသည်။

ဤသို့ အပျော့ဆွဲ စစ်ဆင်ရေး၏ တခြားအစိတ်အပိုင်း တခုမှာ ရောင်စုံ အင်္ဂလိပ်သတင်းစာ တစောင်ကို ထုတ်ဝေရန် ဖြစ်ပြီး မြန်မာတိုင်းမ် (စ်) ဂျာနယ် ကို ထုတ်ဝေနိုင်ခဲ့သည်။ ဤဂျာနယ်က လေးလံပျင်းရိဖွယ် စတာလင်ခေတ်ပုံစံ ၀ါဒဖြန့်ချိ နေသည့် အစိုးရပိုင် သတင်းစာများထက် ပို၍ သစ်လွင်ဆန်းပြားခဲ့သည်။

နောက်တဆင့် အနေနှင့် စစ်အစိုးရက အမေရိကန် အစိုးရကို စည်းရုံးတိုက်တွန်းပေးရန် ကိုယ်စားလုပ်ဆောင်ပေးမည့် ကုမ္ပဏီ (ဒီစီအိုင်) ကို ၂၀၀၂ ခုနှစ်တွင် ငှားရမ်းခဲ့သည်။ ဤကုမ္ပဏီကို စစ်အစိုးရကိုယ်စား တိုက်တွန်းစည်းရုံးရန် ၀န်ဆောင် ပေးမှုအတွက် အမေရိကန်ဒေါ်လာ ၃၄၈၀၀၀ ပေးခဲ့ရသည်။ သူတို့က မြန်မာနိုင်ငံတွင် လူ့အခွင့်အရေး ချိုးဖောက်နေမှုများကို အမေရိကန် နိုင်ငံခြားရေးဝန်ကြီးဌာနက ပြင်းပြင်းထန်ထန် ဝေဖန်ပြောဆိုနေသည့် အပေါ် ချေပပြောဆိုပေးကြရမည် ဖြစ်သည်။ အမေရိကန်ပြည်ထောင်စု တရားရေးဝန်ကြီးဌာန၏ မှတ်တမ်းများအရ ဒီစီအိုင် ကုမ္ပဏီက စစ်အစိုးရနှင့် “နိုင်ငံရေး အရ ပြန်လည်သင့်မြတ်ရေး ဆွေးနွေးပြောဆိုမှုများ စတင်ရန်” စည်းရုံးတိုက်တွန်းမှုများ ဆောင်ရွက်ခဲ့သည်ဟု သိရသည်။

ဤကုမ္ပဏီက စစ်အစိုးရအပေါ် အမြင်ကောင်းလာစေရန်အတွက် လူထုပြန်ကြားဆက်သွယ်ရေး လှုပ်ရှားမှုများ လုပ်ဆောင် ပေးခဲ့ပြီး စစ်အစိုးရ၏ မူးယစ်ဆေးဝါး ကုန်သွယ်မှု တိုက်ဖျက်ရေး ကြိုးပမ်းဆောင်ရွက်ချက်များကို အမွှမ်းတင်ထားသည့် ထုတ်ပြန်ကြေညာချက်များကိုလည်း မူကြမ်းရေးသားပေးခဲ့သေးသည်။ ထိုမျှမက တိုင်းရင်းသားဒေသများ အတွင်းရှိ စစ်ဆင်ရေးများတွင် အဓမ္မပြုကျင့်မှုများကို စစ်လက်နက်တခုသဖွယ် အသုံးချနေသည်ဟူသည့် စွပ်စွဲချက်များ ကိုလည်း တန်ပြန်ရှုတ်ချသည့် ကြေညာချက်များ ရေးသားပေးခဲ့သေးသည်။

ထိုအချိန်က စစ်အစိုးရအနေနှင့် သမ္မတဘုရှ် ဦးဆောင်သည့် အမေရိကန်ပြည်ထောင်စု၏ မူဝါဒများက မြန်မာနိုင်ငံ အပေါ် ပို၍ ပြင်းထန်လာလေမည်လောဟု အမှန်တကယ် စိုးရိမ်ပူပန်မှုများ ရှိနေခဲ့သည်။ “ကျနော်တို့က ဒီအတွက် တန်ပြန်လုပ် ဆောင်ကြရမယ်လို့လည်း တွက်ထားတယ်” ဟု ဗိုလ်မှူးအောင်လင်းထွဋ်က ဆိုသည်။

ဗိုလ်မှူးအောင်လင်းထွဋ်နှင့် သူ၏ အကြီးအကဲများက ခေါင်းချင်းဆိုင်၍ သူတို့အတွက် အကူအညီ ရရှိနိုင်ရန် မည်သူ့ကို ချဉ်းကပ်သင့်သည်ကို တိုင်ပင်ကာ သတင်းအချက်အလက်များ စုဆောင်းခဲ့ကြသည်။ ဗိုလ်ချုပ်ကြီးခင်ညွန့်၏ ထောက် လှမ်းရေးရုံးက စစ်အစိုးရအပေါ် သဘောထားပျော့ပြောင်း လိုလားဟန်ရှိသည့် မြန်မာပညာရှင်များကို စ၍ ချဉ်းကပ် စည်းရုံး ခဲ့ကြသည်။ အလားတူ အမေရိကန်အစိုးရ၏ စီးပွားပိတ်ဆို့ဒဏ်ခတ်မှု မူဝါဒများအပေါ် သဘောမတွေ့သူ များကိုလည်း ရှာဖွေခဲ့ကြသည်။ အတိုက်အခံလှုပ်ရှားမှုအတွင်း မကျေမနပ်ဖြစ်နေကြသည့် နာမည်ကြီး အတိုက်အခံခေါင်း ဆောင်၊ လှုပ်ရှားသူများကိုလည်း ဘက်ပြောင်းရန်အတွက် ချဉ်းကပ်၍ တိုက်တွန်း နားချခဲ့ကြသေးသည်။

ထိုမျှမက စစ်အစိုးရက ကုလသမဂ္ဂ၏ အဆင့်မြင့်အရာရှိများကိုလည်း မြန်မာနိုင်ငံသို့ လာရောက်လည်ပတ်ရန် ဖိတ်ကြားခဲ့ သေးသည်။

ထိုအချိန်က ကုလသမဂ္ဂ၏ လက်ထောက်အတွင်းရေးမှူးလည်းဖြစ် ကုလအကြီးအကဲ ကိုဖီအာနန်၏ အထူးအကြံပေးလည်း ဖြစ်ခဲ့သူ၊ ယခု ဘန်ကီမွန်း လက်ထက်တိုင် အထူးအကြံပေးဖြစ်သူ ဂျိုးဆက်ဖ် ဗာနာရိဒ် ကိုလည်း ရန်ကုန်သို့ ဖိတ်ခေါ်ခဲ့ပြီး ၂၀၀၂ ခုနှစ် ကုလသမဂ္ဂ အထိမ်းအမှတ်နေ့ကို တက်ရောက်စေခဲ့သည်။

ကုလသမဂ္ဂ၏ အဆင့်မြင့် အရာရှိ ရိဒ်က မြန်မာစစ်အစိုးရ ထိပ်ပိုင်းခေါင်းဆောင်များနှင့် နီးစပ်သူဟုလည်း လူသိများကြ သည်။ သူက ကုလသမဂ္ဂတွင် ၁၉၆၁ ခုနှစ်မှ ၁၉၇၁ ခုနှစ်အထိ အထွေထွေအတွင်းရေးမှူးချုပ်အဖြစ် ထမ်းဆောင်တာဝန် ယူခဲ့သူ မြန်မာနိုင်ငံသား ဦးသန့်ကို ဂုဏ်ပြုဖွဲ့စည်းထားသည့် နယူးယောက်မြို့ရှိ ဦးသန့် အင်စတီကျု၏ ဘုတ်အဖွဲ့ဝင်ဖြစ်နေ သည်ကိုလည်း စိတ်ဝင်စားဖွယ် တွေ့ရှိရပြန်သည်။

ကုလသမဂ္ဂ အထိမ်းအမှတ်နေ့အတွက် ပြောကြားသည့် မိန့်ခွန်းတွင် ဗိုလ်ချုပ်ခင်ညွန့်က မြန်မာနိုင်ငံသည် ကုလ သမဂ္ဂ ကဲ့သို့ ကမ္ဘာ့အဖွဲ့အစည်းကို နိုင်ငံတကာငြိမ်းချမ်းရေးနှင့် လုံခြုံရေး ထိန်းသိမ်းနိုင်ရေးအတွက်နှင့် လူသားထု တရပ်လုံး၏ စီးပွားရေးနှင့် လူမှုရေးဖွံ့ဖြိုးတိုးတက်မှုလုပ်ငန်းများအတွက် အခြေခံအဖွဲ့အစည်းအဖြစ် အထူးအလေးအနက်ထားပါ ကြောင်း ပြောခဲ့သည်။

“ကျနော်တို့အနေနဲ့ ကုလသမဂ္ဂကို အထူးအလေးထား ကျေးဇူးတင်ရှိကြောင်း ရိုးရိုးသားသား ဖော်ပြလိုပါတယ်။ အထူး သဖြင့် ယခုလို စွမ်းဆောင်နိုင်ခဲ့တဲ့အပေါ် လေးစားအပ်တဲ့ ကုလသမဂ္ဂ လက်ထောက်အတွင်းရေးမှူး ဂျိုးဆက်ဖ် ဗာနာရိဒ် ကိုလည်း ကျေးဇူးတင်ရှိကြောင်း ပြောလိုပါတယ်” ဟု ဗိုလ်ချုပ်ခင်ညွန့်က သူ၏ မိန့်ခွန်းတွင် ထည့်သွင်း ပြောဆိုခဲ့သည်။

သို့သော် စိတ်ဝင်စားဖွယ်တချက်မှာ ဗိုလ်ချုပ်ခင်ညွန့်က မစ္စတာရိဒ်ကို မည်သည့်အတွက်ကြောင့် ပထမဦးဆုံး ချဉ်းကပ် ရပါသနည်းဟူသည့် မေးခွန်းပင်။

“ကျနော်တို့ စုဆောင်းရထားတဲ့ သတင်းတွေအရ သူက ဒေါ်အောင်ဆန်းစုကြည်ကို မကြိုက်လှဘူး” ဟု ဦးအောင်လင်းထွဋ် က ပြောပြသည်။ သူက မစ္စတာရိဒ်နှင့် ဗိုလ်ချုပ်ခင်ညွန့်အကြား ဆက်သွယ်ရေး ကြားခံအရာရှိအဖြစ်လည်း တာဝန်ယူပေး ခဲ့ရသေးသည်ဟု ရယ်မောရင်း ပြောပြသည်။

ဝါရှင်တန်ရှိ မြန်မာထောက်လှမ်းရေး အရာရှိများကတော့ မြန်မာ့အရေးကို စာနာနားထောင်ပေးမည့်သူများ လွယ်လွယ်နှင့် ရှာဖွေ စည်းရုံး၍ မရနိုင်ကြောင်း သိနေကြသည်။ သူတို့က အမေရိကန်ပြည်ထောင်စု အစိုးရ၏ မူဝါဒများအပေါ် သြဇာ အတော်အသင့်ရှိနေသည့် အမေရိကန်အခြေစိုက် မြန်မာ့အရေး လှုပ်ရှားသူများကို ဆန့်ကျင်ဆောင်ရွက် နေရသကဲ့သို့ ပြည်ပရောက် တက်ကြွလှုပ်ရှားသူများကိုလည်း ရင်ဆိုင်နေကြရသည်။ ကွန်ဂရက်လွှတ်တော်နှင့် သမ္မတရုံးစိုက်ရာ အိမ်ဖြူတော်ကို စည်းရုံးဖို့ မဆိုထားနှင့် အမေရိကန် နိုင်ငံခြားရေးဌာန မှ အရာရှိများကို သူတို့က လွယ်လွယ်နှင့် နားချ နိုင်မည် မဟုတ်ကြောင်း သိနေကြသည်။ စစ်အစိုးရကို အများမြင်နေကြသလို အပြစ်မရှိကြောင်း သူတို့ လွယ်လွယ်ဆောင် ရွက်နားချနိုင်ကြရန် မမြင်ပါ။

အဓမ္မလုပ်အားပေးခိုင်းစေမှုများ၊ ကလေးစစ်သား အရေးကိစ္စ၊ မြန်မာစစ်သားများက စနစ်တကျ အဓမ္မပြုကျင့်နေခြင်း စသည့် ပြဿနာများသည် သူတို့ပူပူလောင်လောင် ဖြစ်နေကြရသည့် ပြဿနာများ ဖြစ်သည်။ နိုင်ငံခြားရေး ကိစ္စများကို ကိုင်တွယ်ဆောင်ရွက်နေကြရသည့် ထိပ်ပိုင်းအစိုးရ ခေါင်းဆောင်များအနေနှင့် ဤတိုက်ပွဲခက်ခဲလိမ့်မည်၊ တောင်ကုန်းကို လှန်၍တိုက်ရမည့် တိုက်ပွဲလည်း ဖြစ်မည်ဟု ဗိုလ်ချုပ်ခင်ညွန့်က သဘောပေါက်ထားသည်။

သို့သော်လည်း ဗိုလ်ချုပ်ခင်ညွန့်၏ ထောက်လှမ်းရေးအရာရှိများက အမေရိကန် နိုင်ငံခြားရေးဝန်ကြီးဌာနမှ အရာရှိတချို့ထံ လမ်းဖောက်နိုင်ခဲ့ကြသည်။ ၎င်းတို့အထဲတွင် အရှေ့တောင်အာရှရေးရာ ဌာန တာဝန်ခံ မက်သယူး ဒေလီလည်း တဦး အပါအ၀င်ဖြစ်ပြီး သူတို့လိုလားချက်များကို သတင်းပေးပို့နိုင်ခဲ့သည်။ မက်သယူးဒေလီ ကိုယ်နှိုက်က တချိန်တွင် မြန်မာနိုင်ငံ အပေါ် ပိတ်ဆို့ဒဏ်ခတ်ရေး မူဝါဒ အလုပ်မဖြစ်ကြောင်းနှင့် မြန်မာနိုင်ငံကို လမ်းကြောင်းမှန်ပေါ် တင်ပေး နိုင်ဖွယ် မရှိကြောင်း ပြောဆိုခဲ့ ဖူးသေးသည်။

နောက်ပိုင်း ၂၀၀၂ ခုနှစ်၊ မေလတွင် စစ်အစိုးရက ဒေါ်အောင်ဆန်းစုကြည်ကို ပြန်လွှတ်ပေးခြင်းဖြင့် ပို၍ ရဲရဲလှမ်းလာခဲ့ သည်။ နိုဗဲလ်ငြိမ်းချမ်းရေးဆုရှင် ဒေါ်အောင်ဆန်းစုကြည်ကို ပြည်တွင်းစည်းရုံးရေး ခရီးစဉ်များ သွားရန်လည်း ပြန်ခွင့်ပြု ပေးခဲ့သည်။ အပြန်အလှန်အဖြစ် ဒေါ်စုကလည်း စစ်အစိုးရ၏ ဖွံ့ဖြိုးရေးစီမံချက်များကို ပြန်၍ လေ့လာကြည့်ရှုပါရန် သဘောတူညီပေးခဲ့သည်။

၎င်းတလတည်းမှာပင် အမေရိကန်ပြည်ထောင်စု၏ ဗီဇာပိတ်ဆို့ အရေးယူမှုနှင့် စီးပွားရေးဒဏ်ခတ်မှု အသက်ဝင် နေသော်ငြားလည်း ထောက်လှမ်းရေးဌာန၏ အကြီးအကဲဖြစ်သူ ဗိုလ်ချုပ်ကျော်ဝင်းက အမေရိကန် ပြည်ဝင်ခွင့်ဗီဇာရခဲ့ပြီး မြန်မာစစ်အစိုးရ၏ မူးယစ်ဆေးဝါး ပပျောက်ရေး ကြိုးပမ်းနေမှုများကို အမေရိကန် အဆင့်မြင့် အရာရှိတချို့ထံ တင်ပြခွင့် ရခဲ့သည်။

ထိုအချိန်တွင် ဒေါ်အောင်ဆန်းစုကြည်က နိုင်ငံ၏ ဒေသအနှံ့အပြားသို့ ခရီးထွက်၍ ထောက်ခံသူများနှင့် တွေ့ဆုံနေ ဆဲမှာပင် ထောက်လှမ်းရေးအရာရှိများကလည်း အတိုက်အခံခေါင်းဆောင်များနှင့် တွေ့ဆုံညှိနှိုင်းရေးကိစ္စများကို နောက် ကွယ်က ပါဝင် လှုပ်ရှားနေခဲ့သည်။ တပ်မတော် ထောက်လှမ်းရေးဌာန အိုစီအမ်အိုင် ၏ ဒုတိယ အကြီးအကဲ ဗိုလ်ချုပ်ကျော်ဝင်း၊ ၎င်း၏လက်ထောက် ဗိုလ်မှူးချုပ်သန်းထွန်းနှင့် ပြည်ထဲရေးဝန်ကြီး ဗိုလ်မှူးကြီးတင်လှိုင်တို့က ဒေါ် အောင်ဆန်းစုကြည်နှင့် တွေ့ဆုံဆွေးနွေးသည့် ကိစ္စများကို တာဝန်ယူ ဆောင်ရွက်ခဲ့ကြရသည်။

ဤသို့ လျှို့ဝှက်ဆွေးနွေးနေသည့် သတင်းများကိုလည်း ဗိုလ်ချုပ်ခင်ညွန့်၏ သစ္စာခံ နိုင်ငံခြားရေးဝန်ကြီး ဦးဝင်းအောင်မှ တဆင့် ယခင် ကုလသမဂ္ဂ အထူးသံကိုယ်စားလှယ်အဖြစ် ဆောင်ရွက်ခဲ့သူ မစ္စတာ ရာဇာလီ အစ်စမိုင်၏ နားအထိ ပေါက် ကြားစေခဲ့သည်။ ရာဇာလီက ဆွေးနွေးပွဲကို သူကိုယ်တိုင်က ကမကထပြု ဆောင်ရွက်ပေးခဲ့ခြင်း မရှိသော်လည်း ဤသတင်းကောင်းကိုမူ ကမ္ဘာသို့ ပြန်၍ ဖောက်သည်ချခဲ့ပြန်သည်။ ဤသတင်းက နှစ်များစွာအတွင်း မြန်မာနိုင်ငံတွင် အကောင်းဘက်သို့ ပြောင်းလဲတိုးတက်လာတော့မည့် အရိပ်အယောင်အဖြစ် လူအားလုံးက ကြိုဆိုခဲ့ကြသည်။

စစ်အစိုးရ၏ ပို၍ နူးညံ့သိမ်မွေ့လာသည့် သတင်းများကို မြန်မာတိုင်းမ် (စ်) ဂျာနယ် က အရောင်တင်ပေးခဲ့သည်။ သူတို့က စစ်အစိုးရ၏ ရည်မှန်းချက်အတိုင်း ဆက်လက်ဝါဒဖြန့်ချိပေးခဲ့ကြသည်။ မြန်မာတိုင်းမ် (စ်) ဂျာနယ် က စစ်အစိုးရ၏ အိပ်ခ်ျအိုင်ဗွီ/အေအိုင်ဒီအက်စ် တိုက်ဖျက်ရေး ကြိုးပမ်းမှုများ၊ ကုလသမဂ္ဂနှင့် ပိုမိုနီးကပ်စွာ ပူးပေါင်းဆောင် ရွက်လာနေမှု စသည်တို့ကို အသားပေးဖော်ပြခဲ့ကြပြီး ယခင် ကုလ အထွေထွေအတွင်းရေးမှူးဟောင်း ဦးသန့်၏ မိသားစုဝင်များ မြန်မာနိုင်ငံသို့ ပြန်၍ လာရောက်လည်ပတ်သည့် သတင်းကိုပင် နိုင်ငံရေး အခြေအနေ ပြောင်းလဲလာမှု သက်သေ တခုအဖြစ် အလေးပေး ဖော်ပြခဲ့ကြသည်။

ဤသို့ တိုးတက်မှုများ ဆက်တိုက်ဖြစ်နေစဉ်မှာပင် ဗိုလ်ချုပ်ခင်ညွန့်က နိုင်ငံတကာ အဖွဲ့အစည်းများဖြစ်သည့် အပြည်ပြည် ဆိုင်ရာအလုပ်သမားအဖွဲ့ချုပ် (အိုင်အယ်လ်အို)၊ အပြည်ပြည်ဆိုင်ရာ ကြက်ခြေနီကော်မီတီ (အိုင်စီအာစီ) စသည်တို့ကို မြန်မာနိုင်ငံတွင် ပို၍ ကျယ်ကျယ်ပြန့်ပြန့် နေရာပေး လုပ်ကိုင်ခွင့်ပြုရေးအတွက် စစ်အစိုးရ၏ ထိပ်သီးခေါင်းဆောင် ဗိုလ် ချုပ်မှူးကြီးသန်းရွှေကို နားချနိုင်ရန် ကြိုးပမ်းခဲ့သေးသည်။

ပို၍ ပွင့်လင်းစွာ ပြုပြင်ပြောင်းလဲမှုများ လုပ်ရန်လိုကြောင်း ဗိုလ်ချုပ်မှူးကြီးသန်းရွှေကို တိုက်တွန်းနားချနိုင်ရန်အတွက် ဗိုလ်ချုပ် ခင်ညွန့်ကပင် တခါတရံ ခေါင်းဆောင်ကြီး၏ လက်ထောက်ဖြစ်သူ ဗိုလ်ချုပ်ကျော်ဝင်းကို ချဉ်းကပ်အားကိုး ခဲ့ရသည်။

ဗိုလ်ချုပ်ကျော်ဝင်းက စိတ်ဓာတ်စစ်ဆင်ရေးကိစ္စများတွင် အထူးကျွမ်းကျင်သူ ဖြစ်ပြီး ဗိုလ်ချုပ်သန်းရွှေ လက်အောက်တွင် လည်း တာဝန်ငယ်စဉ်က အတူတူ ထမ်းဆောင်ခဲ့ဖူးသူ ဖြစ်သည်။ သူက အချိန်မရွေး ဗိုလ်ချုပ်သန်းရွှေ၏ ရုံးခန်းအတွင်းသို့ တံခါးမရှိ၊ ဓားမရှိ ၀င်ထွက်သွားလာနိုင်ခွင့် ရှိသူဟုလည်း သိထားကြသည်။ တခါတရံ သူက ညနက်မှ ပေါက်ချလာတတ်ပြီး လက်ဖက်ရည် အတူသောက်ခြင်း၊ သတင်းပေးခြင်းများ လုပ်တတ်သေးသည်။ မြန်မာနိုင်ငံအတွင်းတွင် နိုင်ငံတကာ အဖွဲ့အစည်းများ ပို၍ လွတ်လပ်စွာ ခွင့်ပေးသင့်ကြောင်း၊ အရေးပါသည့် ကိစ္စများဖြစ်သည့် အဓမ္မလုပ်အားခိုင်း စေမှုနှင့် ကလေးစစ်သားစုဆောင်းမှု ကိစ္စများကို သေချာ ကိုင်တွယ်ဖြေရှင်းရန် လိုအပ်ကြောင်းတို့ကို သူက တိုက်တွန်း နားချ တတ်သည်။

သို့သော် လွယ်ကူလှသော ကိစ္စမဟုတ်ပါ။ ဗိုလ်ချုပ်မှူးကြီးသန်းရွှေက ခေါင်းမာလွန်းလှပြီး နိုင်ငံရပ်ခြားမှ ပြစ်တင် ဝေဖန်နေ မှုများ ကိုလည်း နားထောင် ဂရုစိုက်နေသူ မဟုတ်ကြောင်း ဗိုလ်မှူးအောင်လင်းထွဋ်က ပြောပြသည်။ ဗိုလ်ချုပ်မှူးကြီးကို သူ ကိုယ်တိုင် အကြိမ်တော်တော်များများ ကြုံဆုံခဲ့ရဖူးသည်။

“သူက တဇောက်ကန်းပဲ၊ နိုင်ငံတကာ ဖိအားတွေ ဘာတွေ သိပ်ဂရုစိုက်တာ မဟုတ်ဘူး” ဟု ဗိုလ်မှူးဟောင်းက ပြန်ပြော ပြသည်။

ဥပမာအားဖြင့် ကလေးစစ်သား ပြဿနာတွင် ဗိုလ်ချုပ်မှူးကြီးသန်းရွှေက ဝေဖန်ပြစ်တင်နေမှု အားလုံးကို ပယ်ချခဲ့သည်။ သူ၏ လက်အောက်ငယ်သားများကို “ဘာမှ ပူမနေနဲ့၊ နောက် ၂ နှစ်၊ ၃ နှစ် ဆိုရင် ဒီကလေးတွေအားလုံး အရွယ် ရောက်လာလိမ့်မယ်” ဟုပင် ပြောခဲ့သေးသည် ဆို၏။

“ဒီကိစ္စက ကုလသမဂ္ဂမှာ ကျနော်တို့ အကြီးအကျယ် ရင်ဆိုင်ကြရမယ့် ကိစ္စကြီးဆိုတာ သူက နားမလည်ဘူး” ဟု ဦးအောင်လင်းထွဋ်က ပြောသည်။

ဗိုလ်ချုပ်မှူးကြီး သန်းရွှေနှင့် အလုပ်လုပ်ခဲ့ဖူးသူများကမူ သူက ဆုံးဖြတ်ချက်ချမည်ဆိုလျင် ကြာတတ်ကြောင်းနှင့် မေးခွန်း များ အပေါ်တွင်လည်း ဟုတ်၊ မဟုတ် တိတိပပ အဖြေပေးလေ့မရှိကြောင်း ပြောဆိုကြသည်။ သက်ဆိုင်ရာ အရာရှိက သူ၏ မသဲမကွဲနိုင်လှသည့် အဖြေကို ကိုယ့်ဘာသာ ပဟေဠိ အဖြေညှိကြရသည်။

ဗိုလ်ချုပ်မှူးကြီးက ဆုံးဖြတ်ချက်ချရာတွင် မပြတ်သားသော်လည်း ကမ္ဘာက စိုးရိမ်ပူပန်နေကြသည့် မြန်မာ့အရေး ပြဿနာ များနှင့် ပတ်သက်၍မူ သူ့တွင် အယူအဆ ခိုင်ခိုင်မာမာ ရှိထားပြီးဖြစ်သည်။ သူ့အမြင်တွင် မြန်မာနိုင်ငံက တရုတ်၊ အိန္ဒိယ၊ ရုရှားတို့နှင့် ဆက်ဆံရေး ကောင်းမွန်အောင် ထိန်းသိမ်းထားခြင်းအားဖြင့် နိုင်ငံတကာဖိအားကို ဂရုစိုက်စရာ မလိုဟု သဘောပေါက်ထားသည်။

အရှေ့တောင်အာရှ နိုင်ငံများအဖွဲ့ (အာဆီယံ) အပေါ်တွင်ရော မည်သို့ရှိမည် ထင်ပါသနည်း။ ဦးအောင်လင်းထွဋ်ကမူ ဗိုလ်ချုပ်မှူးကြီးက ၎င်းဒေသဆိုင်ရာအဖွဲ့ကို ခေါင်းထဲပင် ထည့်မစဉ်းစားဟု ဆို၏။

အဆုံးစွန် ဆိုရလျင် ထိုင်းနိုင်ငံက မြန်မာ့စီးပွားရေးအတွက် အကြီးဆုံး နိုင်ငံခြားရင်းနှီးမြှုပ်နှံထားသည့် နိုင်ငံဖြစ်သော်လည်း စစ်အစိုးရအပေါ် သြဇာ မလွှမ်းမိုးနိုင်လှပေ။ ထိုင်းနိုင်ငံသည် မြန်မာ့ သဘာဝဓာတ်ငွေ့ကို မှီခိုနေရကြောင်းနှင့် နယ်စပ် ကုန်သွယ်ရေးအားဖြင့် မြန်မာနိုင်ငံက ထိုင်းနိုင်ငံမှ နိုင်ငံရေးသမားများအပေါ် သြဇာလွှမ်းနိုင်ကြောင်း ဗိုလ်ချုပ်မှူးကြီး သန်းရွှေက ခပ်တင်းတင်း ပြောတတ်သေးသည်။

သို့သော်လည်း ဗိုလ်ချုပ်မှူးကြီးက သူ၏အာဏာကို ခြိမ်းခြောက်လာမည့် အရေးကို ကြည့်၍ စိတ်ချမနေနိုင်ပါ။ ထောက်လှမ်း ရေး အဖွဲ့များက လူထုစည်းရုံးရေး လုပ်ငန်းများဖြင့် ထိုးစစ်ဆင်ရှေ့တက်နေသည့် အချိန်တွင် ဗိုလ် ချုပ်မှူးကြီးသန်းရွှေနှင့် အပေါင်းအပါ ခေါင်းမာဂိုဏ်းသားများက ဗိုလ်ချုပ်ကြီးခင်ညွန့်နှင့် ဒေါ်အောင်ဆန်းစုကြည်တို့ ၂ ဦး၊ ပြည်တွင်းတွင် ပုဂ္ဂိုလ် ရေးအရ သြဇာတက်လာသည်ကို ကြည့်၍ စိုးရိမ်ပူပန်လာကြသည်။

ဒေါ်အောင်ဆန်းစုကြည်ကို အနီးကပ် ခြိမ်းခြောက်မှုဟု ပိုမြင်လာကြသည်။ ဒေါ်အောင်ဆန်းစုကြည်၏ နိုင်ငံတွင်း ခရီးစဉ်များ တွင် ထောက်ခံသူများ သိန်းနှင့်ချီ၍ လာရောက်စုဝေးနေချိန် ဖြစ်သည်။ ဤသို့ဖြင့် ဒီမိုကရေစီ လှုပ်ရှားမှုကို ပြန်လှန် တိုက်ခိုက် ထိုးစစ်ဆင်ရန် တော်ပြီဟု သူတို့က ဆုံးဖြတ်ခဲ့ကြသည်။

ဒေါ်အောင်ဆန်းစုကြည်နှင့် အဖွဲ့ဝင်၊ ထောက်ခံသူများ စီးလာသည့် ယာဉ်တန်းကို ဒီပဲယင်းမြို့အနီးတွင် ၂၀၀၃ ခုနှစ် မေလ၌ လုပ်ကြံတိုက်ခိုက်ကြတော့သည်။ ဤ အစုလိုက် အပြုံလိုက် လူသတ်ပွဲကြီး အပြီးမှာပင် ဒေါ်အောင်ဆန်းစုကြည်ကို ပြန်လည် ထိန်းသိမ်းထားလိုက်သည်။ ဒီပဲယင်းတိုက်ခိုက်မှုတွင် လူအများအပြား အသက်ဆုံးရှုံးခဲ့ရသည်။

ဗိုလ်မှူးအောင်လင်းထွဋ်ကတော့ ဒေါ်အောင်ဆန်းစုကြည်၏ ကားတန်းနောက်မှ လိုက်ပါစောင့်ကြည့်ရသည့် ထောက်လှမ်း ရေးတပ်ဖွဲ့က ဒီပဲယင်းတိုက်ခိုက်မှုနှင့် ပတ်သက်၍ ကြိုတင်မသိရှိခဲ့ဟု ဆို၏။

“သူတို့ တခုခုကြံနေတာတော့ ကျနော်တို့သိတယ်။ ဒါပေမယ့် အစီအစဉ် အတိအကျသာ မသိရတာ” ဟု သူက ပြောသည်။

ချက်ချင်းဆိုသလိုပင် စစ်အစိုးရ ကြိုးပမ်းထားသည့် နာမည်ကောင်းရရေး လုပ်ငန်းများအားလုံး သဲထဲရေသွန် ဖြစ်ခဲ့ရသည်။ သမ္မတဘုရှ် အစိုးရက မြန်မာစစ်အစိုးရအပေါ် ဖိအားများ ချက်ချင်း တိုးမြှင့်ပေးလာခဲ့ပြီး ပို၍ ပြင်းထန်သည့် ပိတ်ဆို့အရေး ယူမှု ပြစ်ဒဏ်များ ချမှတ်ခဲ့သည်။

သို့သော် ဗိုလ်ချုပ်မှူးကြီးသန်းရွှေက ဤမျှနှင့် မရပ်သေးပေ။ နောက်ပိုင်းတွင် သူက ဗိုလ်ချုပ်ကြီးခင်ညွန့်ဘက် ဦးလှည့် လာခဲ့သည်။

စစ်ထောက်လှမ်းရေး အကြီးအကဲကို မယုံကြည်နိုင်ဖြစ်နေကြသူများမှာ ဗိုလ်ချုပ်မှူးကြီး တဦးတည်း မဟုတ်။ တပ်မတော် (ကြည်း) ကာကွယ်ရေးဦးစီးချုပ် ဒု-ဗိုလ်ချုပ်မှူးကြီးမောင်အေးကလည်း ဗိုလ်ချုပ်ကြီးခင်ညွန့်ကို ထိန်းသိမ်းသင့်နေပြီဟု မြင်နေသည်။

ဗိုလ်ချုပ်မှူးကြီးက ဗိုလ်ချုပ်ကြီးခင်ညွန့်ကို တိုက်ရိုက် ရင်မဆိုင်ခဲ့။ အများမထင်ထားသည့် ကိစ္စကို ကာကွယ်ရေး ၀န်ကြီးဌာန အတွင်း လုပ်ဆောင်ခဲ့ပြီး ဗိုလ်ချုပ်ကြီးခင်ညွန့်၏ သြဇာကို လျှော့ချခဲ့သည်။ ပို၍ အရေးကြီးသည်မှာ သူက မျက်နှာသစ် များကို ကောက်တင်လာခဲ့ခြင်း ဖြစ်သည်။ ဗိုလ်ချုပ်ကြီး သူရရွှေမန်း၊ ဗိုလ်ချုပ်ကြီးစိုးဝင်း၊ ဒု - ဗိုလ်ချုပ်ကြီး မြင့်ဆွေ၊ ဒု - ဗိုလ်ချုပ်ကြီး ရဲမြင့်တို့ကို ပစား ပေးလာခဲ့သည်။

တပ်မတော် ကာကွယ်ရေးဦးစီးချုပ်ရာထူး ဆက်ခံရန် ဗိုလ်ချုပ်ကြီးရွှေမန်းကို လက်သပ်မွေးထားခဲ့ပြီး ဗိုလ်ချုပ်ကြီးစိုးဝင်းကို တော့ ထောက်လှမ်းရေးဌာနအတွက် ပြင်ဆင်ထားခဲ့သည်။ ဗိုလ်ချုပ်ခင်ညွန့် ချက်ချင်းဆိုသလို ခုံလှုပ်ဖွယ် ဖြစ်လာသည်။ ပူပန်လာရသည်။ ယခုအခါ "ရန်သူ" ဒေါ်အောင်ဆန်းစုကြည်၏ အန္တရာယ်ပေးနိုင်မှုကို လျှော့တွက်မှုဖြင့် သူ့ကို စွပ်စွဲလာ ကြပြီ ဖြစ်သည်။

၂၀၀၁ ခုနှစ်တွင် ဗိုလ်ချုပ်မှူးကြီးသန်းရွှေက ဗိုလ်ချုပ်ခင်ညွန့်၏ ဆရာဖြစ်သူ ယခင်အာဏာရှင်ဟောင်း ဦးနေ၀င်းကို အိမ် အကျယ်ချုပ်ချထားလိုက်ပြီး ၎င်း၏ သမီးနှင့် မြေးများကိုလည်း အာဏာသိမ်းရန် ကြံစည်မှုဖြင့် စွပ်စွဲထိန်းသိမ်းခဲ့သည်။ ဤ အချိန်မှစ၍ ယခင် အာဏာရှင်ဟောင်းနှင့် နီးစပ်ခဲ့မှုအတွက် ဗိုလ်ချုပ်ကြီးခင်ညွန့်ကိုယ်နှိုက်က မလုံခြုံဟု ပထမဦးဆုံး အကြိမ် စတင်ခံစားလာခဲ့ရသည်။

ဗိုလ်ချုပ်မှူးကြီးက နောက်တကွက် ရွှေ့ပြန်သည်။ ဗိုလ်ချုပ်ကြီးခင်ညွန့်ကို ၀န်ကြီးချုပ်အဖြစ် ခန့်အပ်တာဝန်ပေးခဲ့သည်။ ယခင် ထောက်လှမ်းရေးအရာရှိဖြစ်ခဲ့ဖူးသူ ဗိုလ်မှူးအောင်လင်းထွဋ်၏ အဆိုအရ ဗိုလ်ချုပ်မှူးကြီးသန်းရွှေနှင့် ဗိုလ်ချုပ်ကြီး မောင်အေးတို့ ၂ ဦး စလုံးက ဗိုလ်ချုပ်ကြီးခင်ညွန့်ကို ထောက်လှမ်းရေး အကြီးအကဲ ရာထူးအဖြစ်မှ စွန့်ပါရန်နှင့် ဒု - ဗိုလ်ချုပ်ကြီး မြင့်ဆွေ၊ သို့မဟုတ် ဒု - ဗိုလ်ချုပ်ကြီး ရဲမြင့်သို့ လွှဲပြောင်းပေးရန် တိုက်တွန်းနားချခဲ့ကြသည်ဟု သိရသည်။ သို့သော်လည်း ဗိုလ်ချုပ်ကြီး ခင်ညွန့်က ပယ်ချခဲ့သည်။

နအဖ စစ်အစိုးရအတွင်း အကွဲအပြဲ သတင်းများက အဆင့်မြင့် ထောက်လှမ်းရေးအရာရှိ တချို့ထံမှတဆင့် နိုင်ငံခြား သတင်း မီဒီယာများထံ ပေါက်ကြားခဲ့သည်။ နိုင်ငံခြားရေးဝန်ကြီး ဦးဝင်းအောင်က တခြားအာဆီယံနိုင်ငံများမှ ၀န်ကြီး များကို စစ်အစိုးရ ထိပ်သီးခေါင်းဆောင်များအတွင်း အာဏာအားပြိုင်မှု ရှိနေကြောင်းပင် အရိပ်အမြွက် ပြောခဲ့ဖူးသည်။

ဗိုလ်မှူးဟောင်း အောင်လင်းထွဋ်၏ အဆိုအရမူ နိုင်ငံရေးအရ သဘောထားကွဲလွဲ တင်းမာမှုများအပြင် စီးပွားရေးအရ၊ ပုဂ္ဂိုလ်ရေးအရ အကျိုးစီးပွား အားပြိုင်မှုများလည်း ပတ်သက်နေခဲ့သည်ဟု ဆိုသည်။ ဗိုလ်ချုပ်ကြီးခင်ညွန့်၏ ဇနီးဖြစ်သူနှင့် ၎င်းနှင့် နီးစပ်သည့် မိတ်ဆွေများက ဗိုလ်ချုပ်မှူးကြီးသန်းရွှေ၏ ဇနီး ဒေါ်ကြိုင်ကြိုင်နှင့် တခြားကတော်များအဖွဲ့ကို “ပညာ မတတ်သည့် ကတော်များ ကလပ်” ဟု ခေါ်ဝေါ်သုံးနှုံးခဲ့ကြသည် ဟုလည်း သူက ဆိုသည်။

လာဘ်စားမှုများက တခြားကိစ္စတခုဖြစ်ပြီး ဗိုလ်ချုပ်ကြီးခင်ညွန့်ကို အပြစ်ရှာရေးအတွက် အမှုဆင်ယူခဲ့ခြင်းသာ ဖြစ်သည်ဟု ဗိုလ်မှူးဟောင်းက ဆိုသည်။ ထောက်လှမ်းရေး တပ်ဖွဲ့ဝင်တချို့ကို မြန်မာနိုင်ငံ မြောက်ပိုင်းဒေသတွင် လာဘ်စားမှုနှင့် ဖမ်းဆီး အရေးယူခဲ့သည့် အပြင် မြိတ်တွင် ငါးဖမ်းလှေတစီးကို ဘိန်းဖြူ ၅၀၀ ကီလိုဂရမ်နှင့် ဖမ်းမိသည့်ကိစ္စတွင်လည်း ဗိုလ်ချုပ်ကြီးခင်ညွန့်အမည် ဆက်စပ် ပတ်သက်နေသည်ဟု စွပ်စွဲခဲ့ကြသည်။

၂၀၀၃ ခုနှစ် စက်တင်ဘာလတွင် ကာကွယ်ရေးဝန်ကြီးဌာန၌ ကျင်းပသည့် အစည်းအဝေးတခု၌် စင်ကာပူခရီးစဉ်မှ ပြန်လာ ခဲ့သည့် ဗိုလ်ချုပ်ကြီးခင်ညွန့်နှင့် ဗိုလ်ချုပ်မှူးကြီးသန်းရွှေအကြား အပြင်းအထန် သဘောထားကွဲလွဲကြသည်ဟု ဆိုသည်။ ဗိုလ်ချုပ်ကြီးခင်ညွန့်က နုတ်ထွက်စာပင် တင်ခဲ့သည်ဟုလည်း ဆိုကြသည်။ သို့သော် ဗိုလ်ချုပ်မှူးကြီးက သူ့ကို တာဝန်အသစ် ပေးစရာရှိကြောင်းသာ ပြန်၍ ပြောခဲ့သည်။

အောက်တိုဘာလတွင် ဗိုလ်ချုပ်ကြီးခင်ညွန့်က သူ၏ လက်ထောက် ထောက်လှမ်းရေး အရာရှိများနှင့် လျှို့ဝှက် အစည်း အဝေးတခု ခေါ်ယူခဲ့သည်။ ဗိုလ်ချုပ်မှူးကြီးသန်းရွှေ အပါအ၀င် တခြားထိပ်ပိုင်း တပ်မတော်အရာရှိများ၏ ခြစားမှု အထောက် အထားများကို စုဆောင်းပေးရန် ညွှန်ကြားခဲ့သည်။ ဗိုလ်ချုပ်ကြီးရွှေမန်းက ဤသတင်းကို ချက်ချင်းကြားပြီး ဗိုလ်ချုပ်မှူး ကြီးထံ သတင်းပြေးပို့လာခဲ့သည်။

မန္တလေးမှအပြန် ခရီးတွင် ဗိုလ်ချုပ်ကြီးခင်ညွန့် အဖမ်းခံလိုက်ရသည်။ ပြီးနောက် လာဘ်စားမှု၊ အမိန့်မနာခံမှုတို့ဖြင့် စွဲချက်တင်ခံရသည်။

ဗိုလ်ချုပ်ကြီးခင်ညွန့်ကို လှေကြီးပေါ် လှေငယ်ဆောက်နေသည်ဟု မြင်ကြသည့် တိုင်းမှူးအတော်များများက ဗိုလ်ချုပ် ကြီးခင်ညွန့်ကို ဖြုတ်ချလိုက်ခြင်းအပေါ် ၀မ်းမြောက်အားပေးခဲ့ကြသည်။ အမှန်တွင်တော့ ဗိုလ်ချုပ်မှူးကြီးသန်းရွှေက သူ၏ အာဏာကို ပို၍ ကျစ်လျစ်ခိုင်မာအောင် အားစုနိုင်လိုက်သည်သာမက စစ်တပ်အတွင်း ပို၍ပင် ထောက်ခံမှု ရလာခဲ့သည်။

“စစ်တပ်က ကျနော်တို့ စစ်ထောက်လှမ်းရေးကို မုန်းတယ်။ ဘာဖြစ်လို့လဲ ဆိုတော့ ကျနော်တို့မှာ သူတို့ သတင်း အချက် အလက်တွေ ရှိနေတယ်။ ကျနော်ဆိုရင် ဗိုလ်မှူးအဆင့်ပဲ။ ဒါပေမယ့် ကျနော်က တိုင်းမှူးအဆင့်ကိုတောင် ဆူပူ ကြိမ်းမောင်း လို့ရတယ်” ဟု ဗိုလ်မှူးဟောင်း အောင်လင်းထွဋ်က ပြောသည်။

ယခုအချိန်တွင် လူထု၏ မေတ္တာကို ရရန် စည်းရုံးနေရသည့် တာဝန် နိဂုံးချုပ်ခဲ့ပြီ ဖြစ်သည်။ အာဆီယံ အဖွဲ့၊ တရုတ်နိုင်ငံ နှင့် အနောက်နိုင်ငံများရှိ ဗိုလ်ချုပ်ကြီးခင်ညွန့်ကို လိုလားသူ မဟာမိတ်များ၊ ကုလသမဂ္ဂ အားလုံးက စိတ်ပျက်ကုန်ကြပြီ ဖြစ်သည်။ “သဘောထားပျော့ပြောင်းသည့် အလယ်အလတ်အုပ်စုများ” အားလုံး ဖမ်းဆီးခံရပြီး ချုပ်နှောင်ခံနေရသည်ကို မြင်ခဲ့ကြရသည်။

စစ်အစိုးရက အမျိုးသားညီလာခံပြန်စရန် ကြိုးပမ်းနေသည့် ၂၀၀၄ ခုနှစ်၊ ဒီဇင်ဘာလတွင် စစ်အစိုးရနှင့် ဒေါ်အောင်ဆန်း စုကြည်တို့ တွေ့ဆုံဆွေးနွေးပွဲများ ပြုနေခဲ့သော်လည်း ဗိုလ်ချုပ်မှူးကြီးသန်းရွှေက ဒေါ်အောင်ဆန်းစုကြည်ကို လွှတ် မပေးချင်ခဲ့။ ဒေါ်အောင်ဆန်းစုကြည်က ပြေလည်စေလိုသည့် သဘောထားဖြင့် ဒီပဲယင်းတိုက်ခိုက်မှုအပေါ် ပုဂ္ဂိုလ်ရေး အာဃာတ မရှိပါကြောင်း ဗိုလ်ချုပ်မှူးကြီးထံသို့ပင် စာတစောင်ရေး၍ ပေးပို့ခဲ့သေးသည်။

ထို တွေ့ဆုံပွဲများတွင် ဒေါ်အောင်ဆန်းစုကြည်က သူ့ကို ပြန်လွှတ်ပေးလျင် အန်အယ်ဒီ ပါတီအနေနှင့် အမျိုးသား ညီလာခံ သို့ ပြန်တက်မည်ဟုလည်း သဘောတခဲူ့ကြသည်။

ထိုအချိန်က ၀ါရှင်တန်တွင်ပင် တာဝန်ယူနေရသူ ဗိုလ်မှူးအောင်လင်းထွဋ်က နေ့စဉ်ဆိုသလို ရန်ကုန်မှ ဖုန်းကို စောင့်၍ နားထောင်နေရသည်။ ရန်ကုန်မှ ပြောလာသည်။ အမျိုးသားဒီမိုကရေစီ အဖွဲ့ချုပ် အနေနှင့် အမျိုးသားညီလာခံ ပြန် တက်ဖို့ အရေး ၉၅ ရာခိုင်နှုန်း သေချာနေပြီဟု ဆိုနေသည်။ သို့သော် နောက်ဆုံး အချိန်တွင် သဘောတူညီချက်က ပျက်သွားရ သည်။ ဗိုလ်ချုပ်မှူးကြီးသန်းရွှေက လူထုထောက်ခံသည့် ခေါင်းဆောင် ဒေါ်အောင်ဆန်းစုကြည်ကို လွှတ်ပေး မည့်အရေး ပယ်ချခဲ့သည်။ သူ့ကတိကို သူဖျက်ခဲ့သည်။

၂၀၀၃ ခုနှစ် သြဂုတ်လတွင် လမ်းပြမြေပုံ၏ အဆင့်တခုအဖြစ် အမျိုးသားညီလာခံကို ပြန်လည်စတင် ကျင်းပမည်။ စည်းကမ်းပြည့်ဝသည့် ဒီမိုကရေစီစနစ် ကို ဖော်ဆောင်မည်ဟု ကြွေးကြော်ခဲ့သူမှာ ဗိုလ်ချုပ်ကြီးခင်ညွန့်ဖြစ်သည် ဆိုသည့် အချက်က ကမောက်ကမ နိုင်လှ၏။ ခုတော့ သူနှင့် သူ့မိသားစုဝင်များ အိမ်အကျယ်ချုပ် ကျခံနေရပြီး သူနှင့် နီးစပ်သည့် လက်အောက်ခံ အရာရှိများအားလုံးလည်း နှစ်ရှည်ထောင်ဒဏ်များ ကျခံနေရသည်။ သို့သော် ခြွင်းချက်အဖြစ် ဗိုလ်ချုပ် ကျော်ဝင်းနှင့် ဗိုလ်မှူးချုပ် ကျော်သိန်းက လွတ်၍ ကျန်နေခဲ့သည်။

လျှို့ဝှက်ထောက်လှမ်းရေးဌာန တခုလုံးကို ဖျက်သိမ်းပြီး၍ ၄ နှစ် ကြာသည့်တိုင် ဗိုလ်ချုပ်ကြီးခင်ညွန့်က ဗိုလ်ချုပ်မှူးကြီး သန်းရွှေကို ဖြုတ်ချ၍ အာဏာသိမ်းရန် အကြံအစည်တခု ပြင်ဆင်နေခဲ့သည်ဟု တပ်မတော်သား အများစုက ယုံကြည် ထင်မြင်နေကြဆဲ ဖြစ်သည်။ ဗိုလ်ချုပ်ကြီးခင်ညွန့်က ကာကွယ်ရေးဦးစီးချုပ်လုပ်ရန် ကြံစည်ခဲ့သည်ဟုလည်း ထင်မြင်နေ ကြဆဲ ဖြစ်သည်။

ဦးအောင်လင်းထွဋ် အဖို့မှာမူ စစ်ထောက်လှမ်းရေး အကြီးအကဲ၏ နိဂုံးက စစ်ထောက်လှမ်းရေးဌာနအတွင်းရှိ သူ၏ အလုပ်အကိုင် တက်လမ်းအတွက်လည်း နိဂုံးဖြစ်စေခဲ့သည်။ ဤသို့ဖြင့် ၂၀၀၅ ခုနှစ်၊ မတ်လတွင် အမေရိကန်ပြည်ထောင် စု၌ နိုင်ငံရေးခိုလှုံခွင့် လျှောက်ထားခဲ့သည်။

ထိုအချိန်မှစ၍ သူက ဗိုလ်ချုပ်မှူးကြီးသန်းရွှေကို ပွင့်ပွင့်လင်းလင်းပင် ပြစ်တင်ဝေဖန်ခဲ့သည်။ ပြည်ပရှိ မြန်မာရေဒီယို အစီအစဉ်များမှတဆင့် သူက မြန်မာစစ်အစိုးရ ခေါင်းဆောင်ကို ရာထူးမှဆင်းပေးရန် တောင်းဆိုခဲ့ပြီး အောက်ခြေ စစ်သား များအနေနှင့်လည်း ၎င်းဗိုလ်ချုပ်မှူးကြီးကို ၀ိုင်းဝန်း ဖြုတ်ချကြရန် တိုက်တွန်းခဲ့သည်။

ဦးအောင်လင်းထွဋ်က ယခုအချိန်၌ ထောင်တွင်း အကျဉ်းကျနေကြသည့် တခြား စစ်ထောက်လှမ်းရေး အဆင့်မြင့် အရာရှိ များလည်း အလားတူ ခံစားနေရဖွယ်ရှိသည်ဟု သူယုံကြည်ကြောင်း ဆိုသည်။

ဒီမိုကရေစီအရေး လှုပ်ရှားမှုနှင့် ပတ်သက်၍မူ သူက “ကျနော်တို့က တော်လှန်ရေးအောင်တာ မြင်ချင်ပါတယ်” ဟု ပြောခဲ့လေသည်။
အောင်ဇော်ရေးသားသည့် The Spring before Khin Nyunt’s Fall ကို ဆီလျော်အောင် ပြန်ဆိုဖော်ပြပါသည်။ [Top]